Moska: Azovstal është plotësisht e jona. Ministri Shoigu: Misioni u krye!

Nga OraNews Përditësimi i fundit 20 Maj 2022, 22:30

Pas 86 ditësh rezistencë, u pushtua fabrika e çelikut, simbol i mbrojtjes së Mariupolit dhe Ukrainës. 

Në më pak se 100 orë nga fillimi i evakuimeve, gjithsej 2,439 luftëtarë ukrainas ju dorëzuan armikut, siç ishte urdhëruar nga Shtabi i Përgjithshëm i Kievit pasi ishte "e pamundur të zhbllokohej" ngërçi "me mjete ushtarake", shpjegoi presidenti Volodymyr Zelensky.

Komandantët e regjimentit Azov dhe trupat e tjera të barrikaduara në tunele u përpoqën të qëndronin deri në momentin e fundit. 

"Komanda eprore ushtarake ka dhënë urdhrin për të shpëtuar jetën e ushtarëve të garnizonit tonë dhe për të ndaluar mbrojtjen e qytetit të Mariupolit”, tha në videon e tij të fundit komandanti i Azovit, Denis Prokopenko, i cili të hënën i dha dritën jeshile daljes së shokëve të tij pas urdhrit të parë kundër dorëzimit që erdhi nga Kievi.

Moska publikoi në mbrëmje videon e dorëzimit të tyre, duke pretenduar se Prokopenko u dërgua "me një automjet të blinduar special" në territoret e kontrolluara nga Rusia. 

Tani, për Kievin do të jetë koha për negociata për të tentuar shkëmbimin e të burgosurve me Moskën.

Zelensky shpjegoi se këto do të bëhen edhe me ndërmjetësim ndërkombëtar, duke përmendur kontributin e Turqisë, Zvicrës, Izraelit dhe Francës.

Ndërsa Azovstal bie, ofensiva po përjeton një përshpejtim të ri dramatik në Ukrainën lindore. 

Bombardimi kishte në shënjestër 54 vendbanime në rajonet Donetsk dhe Lugansk. 

Ndër zonat më të goditura nga bastisjet e reja është edhe rajoni i Chernihiv, ku fshati Desna u vu në shënjestër, duke shkaktuar "shumë vdekje.

Sipas ministrit të Mbrojtjes Shoigu, trupat e Moskës "vazhdojnë të zgjerojnë kontrollin e tyre mbi territoret e Donbasit.

"Çlirimi i Republikës Popullore të Luganskut - parashikoi ai - po i afrohet fundit". 

Çmimi i tentativës për pushtim, denoncoi sërish Kievi, është shkatërrimi i qendrave si Rubizhne, e cila u “shkatërrua plotësisht, nuk ka ndërtesa të mbijetuara, shumë shtëpi nuk mund të restaurohen.