Karroca e artë e mbretëreshës Elisabeth II
Nga Besmira Pelushaj Përditësimi i fundit 7 Maj 2022, 13:23
Në pritje të festimeve zyrtare të Jubileut Platinium që shënon 70-vjetorin e Mbretëreshës Elisabeta e II në fron, Britania e Madhe po bëhet gati për ngjarjen më të rëndësishme të vitit. Ditëlindja zyrtare përkon me katër ditë ngjarje publike nga 2 deri më 5 qershor me një sërë aktivitetesh festive.
Pallati "Buckingham" ka publikuar edhe pamjet e karrocës së artë me të cilën monarkja do të bëjë shëtitjen tradicionale teksa do të përshëndesë njerëzit që pritet të mbushin rrugët.
Mbretëresha Elizabeth II mbushi 96 vjeç të enjten teksa urimin e mori nga një bandë ushtarake, dhe përshëndetje ceremoniale me armë. Banda e Gardës së Coldstream, me tunika të kuqe dhe kapele lëkure ariu, interpretoi për turmat e shikuesve jashtë shtëpisë së saj në Kështjellën Windsor, në perëndim të Londrës.
Përshëndetjet ceremoniale me armë kumbuan në të gjithë vendin, duke përfshirë Kullën e Londrës. Por mbretëresha qëndroi e tërhequr në pronat e saj në Sandringham në Anglinë lindore për një pushim të shkurtër. Pallati mbretëror publikoi një fotografi të Mbretëreshës me dy kuajt e saj poni.
Sipas traditës mbretërore që nga shekulli i 18-të, monarku feston një ditëlindje të dytë zyrtare, që zakonisht celebrohet në mot të ngrohtë, në qershor. Mbretëresha është kreu i shtetit të Britanisë dhe 14 vendeve të tjera të Commonwealth-it në mbarë botën.
Mediat shkruajnë se pallati po përgatitet për zbulime të reja rreth jetës mbretërore nga princi Harry, i cili do të publikojë kujtimet e tij më vonë këtë vit. Ish-kapiteni i ushtrisë britanike u largua nga linja e frontit mbretëror vitin e kaluar dhe u transferua në Kaliforni me gruan e tij amerikane Meghan Markle.
