Vendimi i qeverisë: Nga 20 prilli ndalohet peshkimi në liqenet e Ohrit, Prespës, Fierzës, Ulzës e Shkopetit

Nga OraNews Përditësimi i fundit 19 Prill 2022, 16:49

Përmes një vendimi të botuar në Fletoren Zyrtare qeveria bën me dije se ndalohet peshkimi në liqenet e Ohrit, Prespës, Fierzës, Ulzës dhe Shkopetit.

Sipas vendimit të firmosur nga ministrja Frida Krifca, thuhet se bëhet ndalimi i peshkimit,  me  çfarëdolloj  mjeti dhe metode gjuetie, si dhe  mbajtjen në bord, tranzitimin në barkë,  zbarkimin  e  qëllimtë  dhe hedhjen në treg ose për konsum të të gjitha llojeve të peshqve në këto liqene.

Vendimi parashikon që një gjë e tillë të futet në fuqi nga data 20 prill 2022 deri më  20  korrik  2022 për këto liqene.

Poll

Po ashtu përcaktohet edhe periudhat verore në të cilat ndalohet edhe peshimi me rrjeta në fashën bregliqenore prej 300 ml nga bregu.

Vendimi i qeverisë:

PËR NDALIMIN E PESHKIMIT NË LIQENET E OHRIT, PRESPËS, FIERZËS, ULZËS DHE SHKOPETIT

Në  mbështetje  të  pikës  4,  të  nenit  102,  të Kushtetutës,  pikës  1,  të  nenit  13,   të  ligjit  nr.64/2012,  datë  31.5.2012,  “Për  peshkimin”,   të ndryshuar,

URDHËROJ:

1.  Ndalimin  e  peshkimit,  me  çfarëdolloj  mjeti dhe  metode  gjuetie,  si  dhe  mbajtjen  në  bord, tranzitimin  në  barkë,  zbarkimin  e  qëllimtë  dhe hedhjen në treg ose për konsum të të gjitha llojeve të  peshqve  në  liqenet  e  Ohrit  (me  përjashtim  të koranit),  Prespës,  Fierzës,  Ulzës  e  Shkopetit  dhe konkretisht:

Për gjuhcën (cironka) Alburnus Albidus Alborella, prej  20  prillit  deri  më  20  korrik  2022,  në  liqenin  e Ohrit dhe prej 1 prillit deri më 31 korrik 2022, për liqenet e Prespës, Fierzës, Ulzës e Shkopetit.

Për  krapin – Cyprynus Carpio, prej 20 prillit deri më  20  korrik  2022,  në  liqenin  e  Ohrit  dhe  prej  25 prillit  deri  më  25  maj  2022,  për  liqenet  e  Prespës, Fierzës, Ulzës e Shkopetit.

2.  Për  periudhën  20.7.2022  deri  më  20.8.2022, ndalimin    e    peshkimit    me    rrjeta    në    fashën bregliqenore  prej  300  ml  nga  bregu  për  liqenin  e Ohrit   dhe   për   periudhën   25.4.2022   deri   më 25.6.2022, ndalimin e peshkimit me rrjeta në fashën bregliqenore  prej  150  ml  nga  bregu  për  liqenet  e Prespës, Fierzës, Ulzës e Shkopetit.

3. Vendbazimi i varkave të peshkimit do të jetë në pikat e caktuara nga OMP-të përkatëse.

4.  Për  zbatimin  e  këtij  urdhri,  të  hartohet  një Plan i Përbashkët Operativ Veprimi nga Drejtoria e Shërbimeve  të  Peshkimit  dhe  Akuakulturës,  në koordinim  me   OMP-të   përkatëse  që   ushtrojnë aktivitet peshkimi në këto liqene.

5.   OMP-të   të   marrin   të   gjitha   masat   e zhvendosjes  së  objekteve,  ku  peshqit  kanë  lëshuar vezët,  në  rastet  e  rënies  së  nivelit  të  ujit  në  këto liqene.

6.   Për   zbatimin   e   këtij   urdhri,   ngarkohet Drejtoria e Politikave dhe Programeve të Peshkimit dhe   Akuakulturës,   Drejtoria   e   Shërbimeve   të Peshkimit    dhe    Akuakulturës,    Organizatat    e Menaxhimit  të  Peshkimit  të  liqeneve  të  Ohrit, Prespës,    Fierzës,    Ulzës    e    Shkopetit,    duke bashkëpunuar  me  strukturat  e qeverisjes  vendore, Drejtorinë  e  Policisë  së  Rendit  dhe  atë  Kufitare  të qarqeve përkatëse.

Ky  urdhër  hyn  në  fuqi  menjëherë  dhe  botohet në Fletoren Zyrtare.

MINISTËR I BUJQËSISË DHE ZHVILLIMIT RURAL

Frida Krifca