Will Smith jep dorëheqjen nga Oscars pasi qëlloi me shuplakë Chris Rock
Nga OraNews Përditësimi i fundit 2 Prill 2022, 09:51
Aktori amerikan, Will Smith, ka dhënë dorëheqje nga Akademia Oscars pasi goditi me shuplakë komedianin Chris Rock gjatë ceremonisë së ndarjes së Çmimeve Oscars që u mbajt të dielën e kaluar.
Ai ka thënë se do të pranonte "çdo vendim" të vendosur nga organizata.
Në një deklaratë, Smith tha: "Unë i jam përgjigjur drejtpërdrejt njoftimit të seancës disiplinore të akademisë dhe do të pranoj plotësisht të gjitha pasojat për sjelljen time.Veprimet e mia në prezantimin e 94-të të çmimeve Oscar ishin tronditëse, të dhimbshme dhe të pafalshme”.
"Jam zemërthyer, lista e atyre që kam lënduar është e gjatë dhe përfshin Chris , familjen e tij, shumë nga miqtë dhe të dashurit e mi, të gjithë ata që ishin të pranishëm dhe audiencën globale në shtëpi, - shtoi ai.
“Kam tradhtuar besimin e akademisë. I kam hequr të nominuarve dhe fituesve të tjerë mundësinë për të festuar dhe për të nderuar punën e tyre të jashtëzakonshme. Më është thyer zemra. Pra, unë po jap dorëheqjen nga anëtarësimi në Akademinë e Arteve dhe Shkencave të Filmit dhe do të pranoj çdo pasojë të mëtejshme që bordi i konsideron të përshtatshme,"- përfundoi deklaratën Smith.
Dorëheqja e Smith do të thotë se ai humbet të drejtën e votës, por ai ende mund të nominohet për një Oscar dhe të fitojë një çmim për çdo shfaqje të ardhshme.
Akademia tha se kishte pranuar dorëheqjen e Smith dhe do të "vazhdojë të ecë përpara" me procedimet disiplinore kundër aktorit 53-vjeçar për shkelje të standardeve të sjelljes.
Çështja do të diskutohet në mbledhjen e ardhshme të bordit më 18 prill, gjë që mund të çojë në sanksione shtesë.
