Zjarr në një servis në Pogradec, digjen 6 makina, dyshohet për zjarrvënie të qëllimshme. Pronari person problematik (FOTO)
Nga Iris Rezhda Përditësimi i fundit 25 Mars 2022, 07:37
Gjashtë automjete janë djegur në Pogradec, pasi një servis u përfshi nga zjarri.
Ngjarja ka ndodhur rreth orës 04:00 të mëngjesit të sotëm, 25 mars në fshatin Leshnicë.
Burime nga policia bëjnë me dije se flakët përfshinë rrethimin e jashtëm të servisit në pronësi të Geri Pengu. Për pasojë janë djegur 6 automjetet që jepeshin me qira.
Nga të dhënat e para, dyshohet se zjarrvënia mund të ketë qenë e qëllimshme.
Burime për Ora News bëjnë me dije se nga kamerat e sigurisë që ndodhen në zonë janë parë persona të afrohen dhe të kenë hedhur benzinë mbi automjetet duke i vënë zjarrin.
Pronari njihet si person problematik në fushën e narkotikëve. Sipas informacioneve, kanë tentuar edhe herë të tjera që t'i vendosin zjarrin mjeteve.
Dyshohet se janë më tepër se 2 persona autorë të ngjarjes, ndërsa policia po punon për t'i identifikuar.
