Putin "i bie" Navalnyt, kritiku i Kremlinit dënohet edhe për një akuzë tjetër
Nga Amado Çela Përditësimi i fundit 22 Mars 2022, 11:56
Ndërsa shumë raporte nga medie dhe ministri të huaja raportojnë se forcat ruse kanë pësuar sprapsje në Ukrainë, një Gjykatë në Moskë ka shpallur fajtor kritikun e Kremlinit për një akuzë të re, e cila mund të rrisë masën e tij të dënimit.
Një Gjykatë ruse të martën ka shpallur fajtor kritikun e Kremlinit Aleksi Navalni, për akuzën e përvetësimit të parave, çka mund ta rriste ndjeshëm masën e tij të dënimit.
Gjyqtarja e çështjes tha se Navalni ka kryer mashtrim dhe vjedhje prone nga një grup i strukturuar.
Gjyqi i së martës kishte të bënte me përvetësime shtesë të parave dhe shpërfillje të akuzave gjyqësore.
Hetuesit e akuzuan Navalnin për përvetësime të donacioneve prej disa miliona dollarë të cilat u dhuruan për organizatën e tij politike.
Navalni, kritiku më i zëshëm i presidentit Vladimir Putin u dënua me 2 vjet e gjysmë burgim për akuzën e mashtrimit, pasi i mbijetoi një sulmi me agjentin nervor Noviçok për të cilin ai fajësoi Kremlinin.
Helmimi i aktivistit në vitin 2020 dhe arrestimi i tij pas kthimit nga rehabilitimi në Gjermani vitin e kaluar, solli një valë sanksionesh kundër Moskës nga kryeqytetet perëndimore.
Pas arrestimit të Navalnit, organizatat politike të tij në të gjithë Rusinë u shpallën ekstremiste dhe më pas u mbyllën dhe shumë ndihmës të aktivistit u larguan nga vendi nga frika e ndjekjes penale.
