Protesta kundër shtrenjtimit, mijëra qytetarë protestojnë kundër çmimeve në rritje në të gjithë Spanjën

Nga OraNews Përditësimi i fundit 20 Mars 2022, 14:17

Mijëra njerëz protestuan në të gjithë Spanjën kundër rritjes së çmimeve të energjisë dhe rritjes së kostos së produkteve bazike. Protestuesit, të thirrur nga partia spanjolle e ekstremit të djathtë, Vox, kërkuan largimin e kryeministrit socialist, Pedro Sanchez dhe uljen e kostove të jetesës.

Mijëra protestues dolën në rrugët anembanë Spanjës, në shenjë proteste ndaj kostos së lartë të ushqimit, dritave dhe karburantit, të cilat kanë ardhur duke u shtrenjtuar që nga pushtimi rus i Ukrainës.

Tubimet, të cilat u zhvilluan në qytetet kryesore të Spanjës, u thirrën nga partia e ekstremit të djathtë Vox, e cila u përpoq të shfrytëzonte pakënaqësinë sociale në rritje mbi koston e jetesës, që ka vënë shumë familje në vështirësi.

Jashtë bashkisë së Madridit, një turmë prej disa mijëra vetësh u mblodh, duke valëvitur qindra flamuj spanjollë dhe duke bërë thirrje për dorëheqjen e kryeministrit socialist Pedro Sanchez.

"Sanchez, ti je plehrë, ul faturat!" bërtisnin ata, mes thirrjeve patriotike të "Rroftë Spanja!", duke kërkuar nga qeveria të ndërhyjë për uljen e çmimeve.

"Ne kemi qeverinë më të keqe të mundshme. Nuk është as një qeveri, është një fabrikë mjerimi... e cila plaçkit dhe zhvat punëtorët përmes taksave abuzive," tha udhëheqësi i Vox, Santiago Abascal.

“Ne nuk do të largohemi nga rruga derisa të dëbohet kjo qeveri e paligjshme.

Kjo qeveri “po na merr gjithçka”, tha Anabel, një demonstruese 56-vjeçare e cila nuk dha mbiemrin e saj.

"Ata rrisin çmimin e dritave dhe gazit dhe thonë se kjo është për shkak të Putinit, por kjo është një gënjeshtër. Kështu ishte edhe më parë," shtoi ajo.

Vitin e kaluar, çmimet e energjisë u rritën me 72 për qind në Spanjë, vlera më e larta brenda Bashkimit Evropian, dhe kostot janë rritur edhe më shumë që nga pushtimi i Ukrainës nga Rusia. Të hënën, edhe kamionistët spanjollë hynë në grevë për çmimin e karburantit, duke bllokuar rrugët dhe duke shkaktuar probleme në zinxhirin e furnizimit.