Inceneratorët, Shehaj: Zoto mori kontratën në 2017 dhe në të njëjtin ditë e shiti tek biznesmenët italianë. SPAK të veprojë

Nga OraNews Përditësimi i fundit 18 Shkurt 2022, 17:38

Deputeti i PD Agron Shehaj, ka publikuar disa dokumente në rrjetet sociale, ku thuhet se Klodian Zoto mori kontratën në 31 gusht të vitit 2017 dhe po në të njëjtën ditë ai e ka shitur atë fiktivisht te disa biznesmenë italianë.

Në postimin që ka bërë në Facebook, Shehaj thotë se të tre inceneratorët janë një aferë korruptive me të njëjtët autorë.

Në Elbasan, Fier dhe Tiranë përfituesi është Klodian Zoto.  Shehja i bën thirrje SPAK-ut t’i shkojë deri në fund hetimit dhe të sekuestrojë inceneratorin e Tiranës për të ndaluar vjedhjet e mëtejshme.

Postimi i plotë:

Krimi më i madh në aferën e inceneratorëve është ai i Tiranës. Klodian Zoto është fituesi dhe kontraktuesi i koncesionit të inceneratorit të Tiranës me një vlerë prej rreth 430 milionë euro. Zoto mori kontratën në datën 31 gusht 2017 dhe po të njejtën ditë e "shiti" sipas një vetëdeklarimi të paprovuar.

Kjo do të thotë se të tre inceneratorët janë një aferë korruptive me të njëjtët autorë. Në Elbasan, Fier dhe Tiranë është Qeveria Rama që pranoi propozimin, është i njëjti ministër që firmos, Lefter Koka, dhe është po i njëjti përfitues, Klodian Zoto.

SPAK ka provuar korrupsionin në inceneratorin e Elbasanit. Ka identifikuar edhe kompanitë fiktive, të cilat janë përdorur për dhënien e ryshfetit. Të njëjtat kompani që kanë marrë pagesat e ryshfeteve në Elbasan, rezultojnë se kanë marrë pagesa edhe nga inceneratori i Fierit dhe ai i Tiranës.

Është absurde që qytetarët shqiptarë të vazhdojnë të paguajnë milionë euro çdo muaj për Klodian Zoton, edhe pse ky është në kërkim për korrupsion.

Është e qartë se janë të njëjtët njerëz në të tre aferat. Por Tirana, që pjesa më e madhe e aferës së incenetorëve, nuk preket.

Vonesa e SPAK për të vepruar mbi inceneratorin e Tiranës është e pajustifikueshme. SPAK duhet ti shkojë kësaj çështje deri në fund, të sekuestrojë inceneratorin e Tiranës dhe të ndalë vjedhjet.