Pa rrugë e ndriçim, në lagjen “Vullnetari” në Elbasan prej 20 vitesh asnjë investim
Nga Edisona Skënderi Përditësimi i fundit 30 Janar 2022, 13:55
Në lagjen “Vullnetari” në Elbasan banorët ankohen se prej më shumë se 20 vitesh Bashkia nuk ka bërë asnjë investim. Nuk kanë rrugë e as ndriçim ndaj kërkojnë ndërhyrjen e institucioneve.
E pashtruar dhe me gropa, e tillë është gjendja në rrugën kryesore të lagjes “Vullnetari” në Elbasan.
Banorët që jetojnë aty prej vitesh, tregojnë se në dy dekadat e fundit në lagjen e tyre nuk është bërë asnjë investim.
Në shumë raste janë detyruar të ndërhyjnë vetë për të mos lejuar amortizimin e mëtejshëm të rrugës.
"Gropa-gropa, ujë, zhavorr, shqetësim i madh. I gjithë dheu dhe balta shkon në shtëpi."
Kalimi në të vështirësohet gjatë ditëve me shi, sidomos për fëmijët e të moshuarit.
"Kur është shi ikin kalamajtë në shkollë, lagen."
"Kur fillojnë shirat gjithmonë ka probleme sepse mbushet vendi gjithë ujë."
Përveç rrugës, lagjes i mungon edhe ndriçimi.
Bashkia Elbasan e drejtuar nga Gledian Llatja duket se e ka lënë jashtë axhendës së investimeve lagjen “Vullnetari” edhe pse aty jetojnë qindra banorë.
