"Pleqtë si lypësit" Të moshuarit të pakënaqur nga pensionet: Nuk dalin as për ilaçet. Pa fëmijët s'kemi çfarë të hamë

Nga OraNews Përditësimi i fundit 13 Janar 2022, 09:34

Ditën e djeshme, Kosova vendosi të rrisë shumën e përfitimit të skemave të pensioneve. Të gjitha pensionet në vend do  jenë mbi 100 euro.

Po në Shqipëri çfarë ndodh? A janë të kënaqur të moshuarit nga pensionet që marrin? Sa është pensioni minimal në vendin tonë?

Kjo ishte tema e rubrikës Vox Pop me Enkin në emisionin "Ditë e Re" në ekranin e RTV Ora.

Edhe në këtë rast qytetarët shprehen të zhgënjyer duke thënë se pensioni që marrin nuk u del as për shpenzimet bazike të muajit. Madje disa prej tyre thonë se kanë humbur vitet e punës, e si rrjedhojë nuk përfitojnë pension.

Një tjetër qytetar tha se detyrohet të punojë në të zezë, duke ditur që kjo do e penalizojë për pensionin në të ardhmen.

Ndërsa një qytetare  tjetër thotë se pensioni 70 mijë lekë nuk i del, e për pasojë  detyrohet të punojë, që të nxjerrë shpenzimet e muajit.  

Të moshuarit thonë se pa ndihmën financiare nga fëmijët nuk do ia dilnin mbanë  me shpenzimet.

Disa nga përgjigjet e qytetarëve:

"Pleqtë si lypësit e rrugëve, po mos kenë fëmijët ngordhin, nuk kanë çfarë të hanë."

"Gjyshja ime merr 120 mijë lekë pension dhe nuk i dalin as për ilaçe."

"Janë skandaloze pensionet në Shqipëri."

"70 mijë lekë pension nuk më dalin, shkoj edhe punoj."

"Këtu nuk ka pensione, pjesa më e madhe janë të pasiguruar. Janë si puna ime, punojnë në të zezë si puna ime. Mezi jetojmë tani për momentin, për më vonë nuk e di se çfarë do ndodhi. Po largohen të gjithë nga vendi."

"M'i kanë djegur vitet e punës, nuk kam pension, do më mbajnë fëmijët."