Tjetër skandal me tendera, Mark Babani i Vaut të Dejës i jep miliona lek firmave për punë të pakryera
Nga OraNews Përditësimi i fundit 3 Janar 2022, 15:57
Një tjetër tender ka faktuar skandalin në bashkinë e Vaut të Dejës, ku Mark Babani, u jep para kompanive për punime të pakryera. Këtë radhë bëhet fjalë për rikonstruksionin e rrugës Vilë në Njësinë Administrative Temal, ku me firmën e tij kryebashkiaku Mark Babani, merr në dorëzim punime të cilat figurojnë vetëm në letër pasi pas verifikimit në terren është bërë vetëm një pjesë e vogël e punimeve për rikonstruksion e rrugës, ndryshe nga sa pretendohet në urdhër shpenzimet.
Pas denoncimit për dhënie të parave publike për punë të pa kryera, tendera me mungese konkurrence apo kontrata për kompani me ofertat me te larta,të tjera kontrata paraqiten me problem dhe me shkelje ligjore në Bashkinë Vau Dejës. Bëhet fjalë për rikonstruksionin e Rrugës Vile në Njësinë Administrative Temal.
Ndërtuesi në kontratën e lidhur me Bashinë e Vau Dejës parashikon një seri punimesh nga gërmime dheu me eskavator me zinxhir e deri tek punime betoni, punime hekuri apo vendosje pusetash e tubacione. Por në projekt janë ndryshuar zërat e punimeve duke e hequr betonin, hekurin, tubacionet dhe pustetat, e kjo pasqyrohet në preventive e punimeve.
Por denoncimi konsiston në faktin se në preventiv pasqyrohen dhe është paguar për të tjera punime të cilat nuk janë kryer në terren.
Punimet në këtë segment rrugorë, janë prokuruar në vlerën, 5 milion e 183 mijë lek, por dukshëm duket se investimi është shumë i ulët.
Ora News, verifikoi në terren situatën, dhe siç shihet nga pamjet, në këtë rrugë është ndërhyrë vetëm me fadromë në zgjerimin dhe nivelimin e saj, dhe nuk ka asnjë punim tjetër për të cilin pretendohet që është kryer.
Në dokumentin “urdhër shpenzime” thuhet se rruga është mbushur me çakëll e gur gurore si dhe janë ngjeshur me makineri, por nga pamjet duket qartë se traseja është e mbushur vetëm me dheun e gërmuar në vend, nga fadroma.
Gjithashtu thuhet se për këtë rrugë ka punuar një eskavator me zinxhir i ngjashëm me ketë mjet në foto. Por terreni e rrëzon këtë pretendim, pasi rruga është dukshëm më e ngushte se mjeti si dhe infrastruktura për të shkuar në zonën ku janë bërë punimet rruga e pamundëson futjen e një mjeti të tillë.
Hijet e dyshimit mbi abuzimin me ketë tender i forcon edhe fakti se në kundërshtim më ligjin çdo dokument është firmosur nga vetë kryetari i Bashkisë Vau Dejës Mark Babani. Madje siç shihet edhe certifikata e marrjes në dorëzim të punimeve është firmosur nga vetë kryebashkiaku, ndryshe nga sa përcakton ligji se duhet të ngrihet një komision i cili kontrollon punimet e më pas i merr në dorëzim.
Rruga Vilë, në njësinë Administrative Temal është në një zonë të thellë, dhe nuk kuptohet rëndësia e këtij investimi duke shtuar këtu faktin se në aty nuk ka asnjë banesë. Pyetja qëndron në faktin, në qoftë se bashkia Vau Dejes, hap tendera për punime të cilat janë larg syrit të njerëzve, e kjo rrit mundësinë për abuzime me fonde publike.
