Putin fajëson Perëndimin për tensionet, kërkon garanci sigurie nga SHBA
Nga OraNews Përditësimi i fundit 21 Dhjetor 2021, 21:36
Presidenti rus përsëriti të martën, 21 dhjetor kërkesën e tij për garanci nga SHBA dhe aleatët e saj se NATO nuk do të zgjerohet drejt lindjes, duke fajësuar Perëndimin për "tensionet që po krijohen në Evropë".
Fjalimi i presidentit rus Vladimir Putin në një takim me drejtuesit më të lartë ushtarakë të Rusisë erdhi vetëm disa ditë pasi Moska dorëzoi projekt-dokumentet e sigurisë duke kërkuar që NATO të mohojë anëtarësimin e Ukrainës dhe vendeve të tjera ish-sovjetike dhe të anulojë dislokimet ushtarake të aleancës në Evropën Qendrore dhe Lindore.
Kërkesat – të përfshira në një traktat të propozuar sigurie Rusi-SHBA dhe në një marrëveshje sigurie midis Moskës dhe NATO-s – u hartuan mes tensioneve në rritje mbi një grumbullim trupash ruse pranë Ukrainës që ka ngjallur frikën për një pushtim të mundshëm. Rusia ka mohuar se ka plane për të sulmuar fqinjin e saj, por ka bërë presion për garanci ligjore që do të përjashtonte zgjerimin e NATO-s dhe vendosjen e armëve atje.
Putin akuzoi të martën se nëse sistemet raketore të SHBA-së dhe NATO-s shfaqen në Ukrainë, atyre raketave do t'u duhen vetëm minuta për të arritur në Moskë.
"Për ne, kjo është sfida më serioze - një sfidë për sigurinë tonë," tha ai, duke shtuar se kjo është arsyeja pse Kremlini ka nevojë për "garanci afatgjata, ligjërisht të detyrueshme" nga Perëndimi, në krahasim me "garancitë verbale, fjalë dhe premtime” që Moska nuk mund t'u besojë.
Putin vuri në dukje se NATO është zgjeruar drejt lindjes që nga fundi i viteve 1990, ndërsa dha garanci se shqetësimet e Rusisë ishin të pabaza.
“Ajo që po ndodh tani, tensionet që po rriten në Evropë, është faji i tyre (SHBA-së dhe NATO-s)”, tha udhëheqësi rus.
“Rusia është detyruar të përgjigjet në çdo hap. Situata sa vinte e përkeqësohej. Dhe ja ku jemi sot, në një situatë kur jemi të detyruar ta zgjidhim disi."
