Frikë nga Omicron/ OBSH kërkon anulimin e disa organizimeve festive

Nga OraNews Përditësimi i fundit 21 Dhjetor 2021, 07:56

Organizata Botërore e Shëndetësisë u ka kërkuar njerëzve që të anulojnë disa nga planet e tyre të pushimeve për festat e fundvitit, për të mbrojtur shëndetin publik, pasi varianti Omicron po përhapet globalisht.

“Një event i anuluar është më e mirë se një jetë e anuluar”, tha kreu i OBSH-së, Dr Tedros Adhanom Ghebreyesus, duke shtuar se duhet të merren “vendime të vështira”.

"Në disa raste, kjo do të nënkuptojë anulimin ose vonimin e disa festave," tha ai.

Komentet e tij erdhën pasi ekspertët e shëndetit deklaruan se Omicron tani është varianti dominues në SHBA.

Dr Tedros shtoi se tani ka prova se varianti "po përhapet dukshëm më shpejt se... Delta".

Një numër vendesh, përfshirë Francën dhe Gjermaninë, kanë shtrënguar kufizimet e Covid dhe kanë vendosur kufizime të udhëtimit në përpjekje për të ndaluar përhapjen e variantit të ri.

Holanda ka vendosur bllokim të rreptë gjatë periudhës së Krishtlindjes.

Shtëpia e Bardhë tha të hënën se presidenti Joe Biden nuk po planifikon "të mbyllë vendin".

Eksperti më i lartë i sëmundjes infektive në vend, Dr Anthony Fauci, paralajmëroi më herët se udhëtimet e Krishtlindjeve do të rriste përhapjen e Omicron edhe në mesin e të vaksinuarve plotësisht.

Qendrat Amerikane për Kontrollin dhe Parandalimin e Sëmundjeve (CDC) dhe Departamenti i Shtetit kanë këshilluar amerikanët të mos udhëtojnë në tetë vende, përfshirë Spanjën, Finlandën dhe Libanin.

Në MB, kryeministri Boris Johnson tha të hënën se qeveria duhet të "rezervojë mundësinë" për të sjellë rregulla të reja në Angli ndërsa rastet e Omicron u rritën, por nuk njoftoi kufizime të mëtejshme.

Festimet e Vitit të Ri në sheshin Trafalgar të Londrës janë anuluar "në interes të sigurisë publike", tha kryebashkiaku Sadiq Khan.

Omicron, i identifikuar për herë të parë në Afrikën e Jugut në nëntor,  është klasifikuar si një "variant shqetësues" nga OBSH.