Frika nga varianti i ri i Covid, Izraeli mbyll kufijtë për 14 ditë, mban nën monitorim vendasit
Nga OraNews Përditësimi i fundit 28 Nëntor 2021, 11:01
Izraeli do të mbyllë kufijtë për shtetasit e huaj për 14 ditë si masë për të parandaluar përhapjen e llojit të ri Covid, raportojnë mediat lokale.
Ndalimi pritet të hyjë në fuqi sonte në mesnatë pas miratimit nga qeveria.
Deri tani Izraeli deri më tani ka konfirmuar një rast të llojit potencialisht më infektiv Omicron të zbuluar për herë të parë në Afrikën e Jugut.
Shumë vende kanë ndaluar që atëherë udhëtimet në Afrikën e Jugut dhe fqinjët e saj.
Afrika e Jugut është ankuar se po ndëshkohet, në vend që të përgëzohet për zbulimin e Omicron në fillim të këtij muaji.
Organizata Botërore e Shëndetësisë ka paralajmëruar se varianti i ri është "shqetësues", me provat e hershme që sugjerojnë një rrezik më të lartë të ri-infektimit.
Sidoqoftë, OBSH ka kritikuar vendet që vendosin me nxitim kufizime udhëtimi, duke thënë se ata duhet të shikojnë një "qasje të bazuar në rrezik dhe shkencë".
Karantinë dhe për vendasit
Përveç ndalimit të hyrjes për jo-izraelitët, do të kërkohet një karantinë e detyrueshme tre ditore për të gjithë shtetasit izraelitë të vaksinuar dhe një karantinë shtatë ditore për ata që nuk janë vaksinuar.
Kabineti autorizoi gjithashtu mbikëqyrjen e pacientëve të konfirmuar me koronavirus nga agjencia e sigurisë Shin Bet e Izraelit.
Në një deklaratë, kryeministri Naftali Bennett tha se teknologjia e gjurmimit të telefonit do të përdoret.
Më herët të shtunën, autoritetet izraelite kishin vendosur 50 vende afrikane në të ashtuquajturën listë të "kuqe".
Të gjithë shtetasit izraelitë që kthehen nga ato vende duhet të karantinohen në hotelet e miratuara nga qeveria dhe t'i nënshtrohen testeve Covid.
Një ndalim për të huajt që hyjnë në Izrael nga shumica e vendeve afrikane u vendos të premten.
Izraeli ka konfirmuar më shumë se 1.3 milionë infeksione Covid që nga fillimi i pandemisë, me mbi 8,100 vdekje, sipas universitetit amerikan Johns Hopkins.
