Zbulohet skema e mashtrimit të Micro Credit Albania, RTV Ora zgjidh problemin e qytetarit
Nga Alketa Çeku Përditësimi i fundit 5 Nëntor 2021, 16:39
Investigimi i RTV ORA tregoi me zë dhe figurë se si shantazhohen qytetarët nga Micro Credit Albania për të paguar kredi që i kanë shlyer prej vitesh. Pa i pajisur qytetarët me asnjë lloj dokumenatcioni se janë debitorë Micro Credit i bën presion me letra pa firmë dhe vulë se do t’i çoje në dyert e Gjykatës.
Gazetarja: I ka shkuar zotërisë kjo letër, kush e ka dërguar? Emër, mbiemër, firmë, vulë, e kujt është kjo letër?
Micro Credit Albania: Është institucioni Micro Credit Albania.
Gazetarja: Personi? Kush e dërgon?
Micro Credit Albania: Kjo është pa emër, mbiemër.
Qytetari: Po më jep kontratën që të kam kërkuar, që e ke blerë ti.
Micro Credit Albania: Bëje kërkesën me shkrim.
Gazetarja: E kam bërë, s'kemi përgjigje. Kërkoni 4 milionë lekë për një gjë që e ka paguar.
TV ORA nuk e la me kaq ndjekjen e kësaj problematike. Micro Credit Albania pretendon se i ka blerë Bankës së Tirana kredinë e shtetasit me iniciale F.B dhe i kërkon qytetarit që t'i paguajë 4milion lekë te vjetra.
Gazetarja e RTV ORA iu drejtua Bankës Tirana për të pyetur nëse qytetari është debitor te kjo Bankë, për më tepër a është bërë shitja e kredisë te MCA?
Në kthimin e përgjigjes Banka e Tiranës na bën me dije se qytetari nuk është debitor, për më tepër nuk i ka shitur kredi MCA.
Qytetari: Banka e Tiranës na solli përgjigjen që ne e kemi shlyer kredinë dhe nuk i kemi më asnjë detyrim MCA që më kërkonte 4 milionë e 70 mijë lekë për këtë kredi që kisha shlyer. Ata gjatë 4 vjetëve kishin bërë presion ndërkohë që unë nuk i kisha asnjë detyrim. Falë këmbënguljes së Ora News ne arritëm të marrim informacionin e saktë edhe te Micro Credit që nuk i kishim asnjë detyrim. Falenderoj televizionin Ora News që u bë vëlla me mua në shqetësimin tim.
Po kush është Micro Credit Albania e cila shqetëson në këtë formë qytetarët?
MCA është një institucion financiar jo bankar licensuar nga Banka e Shqipërisë. Edhe institucioni qendror i bankave pretendon se ushtron kontrolle mbi MCA, por faktet nxjerrin zbuluar të kundërtën.
