Recepsionisti që gjeti të vdekur turistët rusë në Kavajë: I thirra disa herë për t'i thënë se pijet ishin gati, s'u përgjigjën
Nga OraNews Përditësimi i fundit 16 Tetor 2021, 10:06
Zbardhet dëshmia e recepsionistit të resortit “Gloria Palace”, në Qerret të Kavajës, që gjeti të vdekur katër turistët rusë (që dyshohet të jenë familjar mes tyre) në saunë, mbrëmjen e djeshme (15 tetor 2021).
Ai thotë se i thirri turstët disa herë jashtë derës së dhomës së hotelit ku qendronin për t'i njoftuar se pijet dhe frutat që kishin porositur ishin gati.
Recepsionisti tregon se pasi ata nuk u përgjigjën, ai hyri brenda dhomës ku i gjeti në gjendje të asfiksaur.
"I thirra disa herë për t'i njoftuar se pijet dhe frutat ishin gati.
Pasi nuk mu përgjigj njeri hyra brenda në sauna dhe i pash të katërt, nuk mu përgjigjën. Njëri ishte i shtrirë në shezlong, dy në stol dhe një tjetër ulur me këmbët në pishinë. Ishin të asfiksuar”, thotë recepsionisti.
Nga burimet jo zyrtare thuhet se të 4 personat mund të kenë qëndruar në Sauna më shume se sa lejohet, ndërsa ekspertiza mjeko ligjore do të tregojë shkaqet të cilat mund të kenë ndikuar në asfiksinë.
Shtetasit e huaj kishin ardhur në vendin tonë për të kaluar pushimet rreth një javë më parë, ndërsa ishin vendosur në resortin “Gloria Palace”në Qerret të Kavajës.
Nataliia Burenkova 58 vjeçe, Sergei Burenkov, 60 vjeç, Nikita Belousov, 37 vjeç dhe Ekaterina Burenkova, 31 vjeçare të gjithë në lidhje familjare mes njëri tjetrit.
Grupi hetimor ka marrë informacion nga turistët rusë qe ishin në grupin e viktimave për të bërë të mundur saktësimin e orës që 4 familjaret mund të jenë futur në saunë.
