Vlorë/ Babë e bir plagosen teksa ruanin parcelën e hashashit, 3 persona shkuan për të vjedhur
Nga Edi Ruçi Përditësimi i fundit 9 Tetor 2021, 11:30
Babë e bir në Mavrovë të Selenicës mbetën të plagosur në tentativë për të mbrojtur bimët narkotike që kultivonin pranë banesës në zonën e thellë. Sipas policisë ata u përleshën me tre persona të cilët dyshohet se donin t'u merrnin kanabisin.
Babë e bir mbetën të plagosur në fshatin Mavrovë të Selenicës në një përpjekje të dyshuar për të mbrojtur nga vjedhja me dhunë e kanabisit që po kultivonin në mënyrë të paligjshme.
Ngjarja u shënua në orët e para të mëngjesit të së shtunës.
Vilson e Fatjon Dautaj sipas dëshmive u konfliktuan me tre persona ende të panjohur që dyshohet se i sulmuan për të vjedhur bimët narkotike pranë stanit të familjes.
Babë e bir duket se i bënin roje kanabisit dhe i kanë diktuar hajdutët dhe kanë bërë rezistencë duke u përleshur fizikisht e me armë të ftohta.
Në këto rrethana babai 60 vjeçar dhe i riu 31 vjeçar kanë marrë goditje me thika për të cilat po trajtohen jashtë rrezikut për jetën në Spitalin e Vlorës.
Pas informacionit për ngjarjen, policia kontrolloi zonën dhe zbuloi 180 rrënjë kanabis sativa të cilat u asgjësuan.
Në banesën e familjes Dautaj, blutë gjetën edhe një automatik dhe një pushkë, të cilat u sekuestruan.
Ndërsa nga këqyrja e vendngjarjes janë evidentuar disa njolla gjaku, mbi bazë të të cilave ngrihet dyshimi se edhe hajdutët e hashashit kanë mbetur të plagosur.
Por deri më tani nuk ka konfirmime nëse ata janë paraqitur në ndonjë qendër shëndetësore për t'u trajtuar.
Policia e Vlorës thotë se punon për të zbardhur ngjarjen në Malet e Selenicës dhe identifikimin e arrestimin e të gjithë personave të përfshirë./OraNews/
