Rumani, akuza për blerje deputetësh, sot mocioni i mosbesimit kundër kryeministrit

Nga OraNews Përditësimi i fundit 5 Tetor 2021, 09:21

Partia nacionaliste që është ndarë nga koalicioni, i cili qeveris Rumaninë pretendon se kryeministri, Florin Kicu, po tenton të blejë deputetët e saj për të fituar mocionin e mosbesimit kundër tij, që do të mbahet të martën.

Opozita rumune ka akuzuar kryeministrin Florin Kicu se po tenton përmes ryshfetit që t'i shpëtojë mocionit të mosbesimit.

Akuzat u bënë nga George Simion, kryetari i partisë "Aleanca për Bashkimin e Rumunëve", i cili drejton 40 deputetë.

Simion pretendon se ka telefonata të regjistruara ku parlamentarëve të tij i kërkohet ta bojkotojnë votimin kundër qeverisë të planifikuar gjatë ditës.

Në këmbim, deputetë të shumicës u kanë ofruar poste në bordet e kompanive shtetërore të energjisë.

Partia e Simionit provoi edhe në shtator të kërkojë mocion mosbesimi kundër kryeministrit Kicu, por tentativa u bllokua nga parlamenti, ndërsa të martën debatohet mocioni i propozuar nga Partia tjetër Socialdemokrate.

Opozita pretendon se i ka votat e nevojshme për ta rrëzuar qeverinë e djathtë.

Kryeministri Kicu fitoi javën e kaluar garën për lidershipin e Partisë së tij Liberale Kombëtare, por është kritikuar për menaxhimin e dobët të pandemisë, dhe koalicioni qeverisës u trondit një muaj më parë nga shkarkimi prej tij i ministrit të Drejtësisë./Ora News/