“U rritën çmimet, jo ekonomia”, qytetarët: Me të ardhurat që kemi e pamundur të blejmë ilaçet
Nga Anxhela Celibashi Përditësimi i fundit 1 Tetor 2021, 14:55
"Në tremujorin e dytë të këtij viti rritja shënoi 18%."
Por kjo rritje ekonomike nuk është ndjerë te qytetarët, të cilët thonë se me vështirësi përballojnë jetesën.
Me pensionet që kanë, disa e kanë të pamundur të blejnë edhe ilaçet.
"Nuk e besoj sepse shikoj tregun se si është."
"Kemi ndjerë zbritje, në kuptimin që jemi varfëruar ne."
"Ilaçet më shkojnë 139 mijë lekë të vjetra. Pensionin e kam 129 mijë lekë."
Rritja e çmimeve për produktet bazë të shportës, ka rënduar xhepat e popullatës.
"Mielli ka shkuar në kupë të qiellit dhe buka është poshtë kiles."
"Me një pension 80 mijë lekë të vjetra çfarë do bësh?"
Në kohën kur autoriteti i konkurrencës fali gjobën ndaj kompanive më të mëdha të miellit, çmimi i produkteve të tij do të vijoj të jetë disa lekë më shumë.
Presidenti i shoqatës së prodhimit të bukës, pasticerive dhe brumrave, Gëzim Peshkëpia thotë se çmimi nuk mund të përcaktohet i njëjtë për të gjithë.
"Në fakt shoqata nuk merrem me çmimet, ajo është një veprimtari e vetë prodhuesve, por mundohemi që të ruajmë një ekuilibër midis prodhimit tonë, çmimeve të shitjes dhe kostos së rënduar," tha Peshkëpia.
Presidenti i dhomës kombëtare të zejtarisë, Luan Bregasi është kundër rritjes së çmimit të bukës por kjo sipas tij është e diktuar nga çmimi i miellit.
"Unë mendoj që qeveria shqiptare bashkë me shoqatën mund të ulen të diskutojnë që të krijojnë një ekuilibër të ri të çmimit," tha Bregasi.
Muajin e fundit buka po shitet me 5 deri në 20 lekë më shumë, por ky ndryshim duket se do të mbetet i njëjtë, pasi nga institucionet përkatëse nuk është marrë asnjë masë deri tani./OraNews/
