Tri ditë bllokadë në pikat kufitare veriore, thirrja e Kurtit: T'i heqim targat bashkë me Serbinë
Nga OraNews Përditësimi i fundit 22 Shtator 2021, 11:22
Vazhdojnë thirrjet për Kosovën dhe Serbinë që të ulin tensionet pas masës së fundit të reciprocitetit nga Prishtina. Qeveria kosovare thotë se kërcënimet e palës serbe me ultimatume në këmbim të dialogut nuk e ndihmojnë situatën.
Kosova e ka ftuar Serbinë t'i japin fund bashkërisht tensioneve që ka krijuar futja në fuqi e reciprocitetit për targat e përkohshme të automjeteve.
Prej së hënës, kamionë e vetura të protestuesve serbë kanë bllokuar rrugët drejt kufijve në Bërnjak dhe Jarinjë.
Kryeministri Albin Kurti deklaroi gjatë një mbledhjeje qeverie se presidenti serb, Aleksandër Vuçiq, po i nxit incidentet.
“Oferta jonë publike besoj që është tejet praktike, përveçse gjeneroze. Le t'i heqin tabelat e përkohshme edhe Serbia edhe Kosova. Incidentet dhe eskalimi nuk janë në interesin e shtetit të Kosovës, nuk ka interes as Serbia dhe duket se vetëm një individ ka interes për to, e ky është presidenti i Serbisë,” tha Kurti.
Beogradi pretendon se me reciprocitetin Kosova po shkel dispozitat e Marrëveshjes së Brukselit të vitit 2011.
Bashkimi Europian reagoi përsëri me komisionerin për Zgjerimin, Oliver Varhei.
"Është e domosdoshme që Serbia dhe Kosova të përmbahen dhe të ulin tensionet, t'i kthehen dialogut dhe të sigurojnë pa vonesë lirinë e lëvizjes. Veprimet e njëanshme nuk janë kurrë zgjidhje," shkroi Varhei në twitter.
Presidenti i Serbisë tregoi një ditë më parë se që të ulen të bisedojnë, pala kosovare duhet fillimisht të tërheqë trupat speciale që ka çuar në veri.
Homologia e tij në Kosovë, Vjosa Osmani, e diskutoi një ditë më parë çështjen me kryesekretarin e NATO-s, duke i dënuar kërcënimet dhe veprimet e Serbisë.
Përmes reciprocitetit, Kosova po u kërkon shoferëve me targa të Serbisë të pajisen përkohësisht me targa kosovare, siç detyrohen edhe shtetasit me targa të Kosovës nga pala serbe.
