Fjalimi i Mustafës në Hagë vijon i mbyllur: Jam në stres pas 12 muajve paraburgim
Nga OraNews Përditësimi i fundit 21 Shtator 2021, 11:27
“Kohët e fundit më është shkaktuar një stres dhe ky stres vjen si pasojë e disa faktorëve të ndryshëm”. Kështu deklaroi i akuzuari nga Specialja, Salih Mustafa, në seancën e sotme ku po zhvillohet gjykimi i tij në Hagë.
Ish-pjesëtari i Ushtrisë Çlirimtare të Kosovës (UÇK), Salih Mustafa po flet para trupit gjykues sot në Dhomat e Specializuara në Hagë por seanca po vijon e mbyllur për publikun.
Salih Mustafa dje la sallën e gjyqit dhe avokati i tij deklaroi se nuk dëshiron të jetë i pranishëm në sallën e gjyqit gjatë gjykimit të tij.
Por trupi gjykues e ka kërkuar prezencën e tij sot në sallë dhe menjëherë pas fillimit të seancës Mustafa ka kërkuar të flasë dhe ka deklaruar se kohët e fundit po përballet me stres.
“Që në fillim po ju them se as dëshira ime as qëllimi im nuk është që të mos ju respektoj ju dhe panelin e kësaj gjykate por as zonjën avokate që është ulur atje përballë sepse nuk është as në bindjen time e as në kulturën time por kohët e fundit më është shkaktuar një stres dhe ky stres po vjen si pasojë e disa faktorëve të ndryshëm dhe tani po ua them se cili është problemi. Pas 12 muajsh në paraburgim...”, ka thënë Mustafa dhe seanca ka vijuar e mbyllur pastaj.
Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte dhe kundër njerëzimit, dhe u dërgua në objektin e paraburgimit në Hagë.
Ky është gjykimi i parë që ka filluar në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.
Në deklarimin e tij para trupit gjykues, Salih Mustafa është deklaruar i pafajshëm.
