I shtruar prej gati një jave në spital, legjenda e futbollit Pele i nënshtrohet operacionit, vuante nga tumori
Nga OraNews Përditësimi i fundit 6 Shtator 2021, 22:53
Futbollisti brazilian Pele i është nënshtruar një operacioni pasi u diagnostikua me tumor të zorrës së trashë dhe po shërohet, njoftoi spitali në Sao Paolo ditën e sotme (6 shtator).
"Tumori u identifikua gjatë ekzaminimeve rutinë kardiovaskulare dhe laboratorike dhe materiali u dërgua për analiza patologjike," tha Spitali Albert Einstein ku Pele është trajtuar që nga 31 gushti.
"Falënderoj Zotin që ndihem shumë mirë," shkroi 80-vjeçari në faqen e tij në Instagram të hënën.
"Për fat të mirë, jam mësuar të festoj fitore të mëdha përkrah jush."
"Do ta përballoj këtë me një buzëqeshje në fytyrë, shumë optimizëm dhe gëzim për të jetuar i rrethuar nga dashuria e familjes dhe miqve të mi."
Pele do të dalë nga kujdesi intensiv të martën, tha spitali në një deklaratë.
Pele, emri i të cilit është Edson Arantes do Nascimento, ka pasur probleme shëndetësore vitet e fundit.
Në fund të vitit 2014, ai vuajti nga një infeksion serioz i traktit urinar dhe u vendos në kujdes intensiv dhe në dializë.
Tre Kupat e Botës
Lojtari i vetëm në histori që ka fituar tre Kupat e Botës (1958, 1962 dhe 1970), Pele konsiderohet nga shumë njerëz si futbollisti më i madh i të gjitha kohërave.
Ai doli në skenën globale vetëm 17 vjeç me gola verbues, përfshirë dy në finalen kundër Suedisë pasi Brazili fitoi Kupën e Botës për herë të parë në 1958. /OraNews/
