Kosova në ndihmë të Shqipërisë, Osmani autorizon dërgimin e FSK-së për shuarjen e zjarreve
Nga OraNews Përditësimi i fundit 9 Gusht 2021, 21:18
Vjosa Osmani, presidentja e Kosovës, ka autorizuar dërgimin e trupave dhe pajisjeve të FSK-së për ndihmë Shqipërisë në shuarjen e zjarreve.
Përmes një njoftimi presidenca e Kosovës ka bërë me dije se qeveria e Kosovës i ka ofruar ndihmë Republikës së Shqipërisë në shuarjen e zjarreve.
Presidentja Vjosa Osmani, në cilësinë e komandantes supreme, në pajtim me kompetencat saj ka nënshkruar autorizimin për dërgimin e trupave dhe pajisjeve të FSK-së në operacion humanitar dhe në të njëjtën kohë e ka informuar për këtë veprim Kuvendin e Kosovës.
Trupat dhe pajisjet FSK-së, do t’i vihen në dispozicion autoriteteve shqiptare me qëllim të shuarjes dhe vënies në kontroll të zjarreve.
Ndërkohë, beteja me zjarret po vazhdon tash e dy javë në këtë shtet, ndërsa policia shqiptare ka njoftuar ditët e fundit dhe për arrestimin e disa personave në zona të ndryshme të vendit, të dyshuar për zjarrvënie të qëllimshme.
