Dhoma Amerikane e Tregtisë, 40 rekomandime qeverisë për të tërhequr investimet e huaja
Nga OraNews Përditësimi i fundit 28 Qershor 2021, 10:57
Dhoma Amerikane e Tregtisë ka paraqitur 40 rekomandime qeverisë shqiptare për të bërë të mundur thithjen e investimeve të huaja. Dënimi i rasteve të korrupsionit, sistem transparent i llogaridhënies si dhe garë reale në tendera qëndrojnë në vërejtjet kryesore. Madje në draft nënvizohet dhe kërkesa për uljen e ndikimit politik në tendera.
Shqipëria duhet të bëjë ende shumë progres për të përmirësuar klimën e biznesit.
Për këtë qëllim Dhoma Amerikane e Tregtisë ka publikuar një paketë me 40 rekomandime drejtuar qeverisë dhe parlamentit të ri.
Më kryesorja në agjendë evidentohet miratimi i një strategjie për investimet e huaja direkte, pasi siç u pranua dhe në draftin e Ministrisë së Financave nuk ka ende një profil të qartë për të orientuar investitorët.
Por edhe niveli i lartë i korrupsionit mbetet një problematikë shqetësuese, ndaj kërkohet një program efektiv për ta luftuar atë.
Për këtë kërkohen sanksione reale ndaj abuzuesve dhe monitorim transparent i llogaridhënies në mënyrë që të krijohet besueshmëria në publik.
Rekomandimet synojnë krijimin e një sistemi transparent, efektiv dhe pa ndikim politik tek Prokurimet Publike si dhe garantimin e Konsultimit Publik efektiv duke dëgjuar më shumë zërin e qytetarëve dhe palëve të interesuara.
Në lidhje me tenderat Dhoma Amerikane e Tregtisë rekomandon transparencë në zhvillimin e procedurave dhe uljen e ndikimit politik.
Sipas saj shumë investitorë përjashtohen nga gara në mënyrë arbitrare.Ndërkohë që sa më shpejt kërkohet edhe modernizimi i sistemit të taksave për rritjen e konkurrencës dhe investimeve rajonale.
Dhoma Amerikane kërkon një implementim të këtyre rekomandimeve si një garanci për ndërtimin e një klime biznesi dinamike dhe shndërrimin e Shqipërisë në një vend konkurrent në rajon.
