Familja u shua në aksident, Meta: Na tronditi të gjithëve, policia të marrë masat
Nga OraNews Përditësimi i fundit 25 Qershor 2021, 13:16
Presidenti Ilir Meta ka reaguar për aksidentin tragjik të ndodhur mëngjesin e sotëm në Vlorë, ku humbën jetën katër anëtarë të një familje.
Më anë të një postimi në Facebook, zoti Meta i ka shprehur ngushëllimet familjes për tragjedinë dhe i ka bërë thirrje Policisë Rrugore dhe çdo strukture tjetër përgjegjëse, të marrin të gjitha masat efektive për të parandaluar të tilla tragjedi.
"Kam përcjellë me trishtim shumë të thellë lajmin e rëndë të humbjes së familjes Gushi në një aksident tragjik në aksin rrugor Fier-Vlorë.
I bashkohem dhembjes së të afërmve dhe ju shpreh ngushëllimet më të ndjera!
Zoti t'ju japë forcë për të përballuar këtë tragjedi, që na ka tronditur sot të gjithëve.
Duke kërkuar një hetim të plotë, i apeloj Policisë Rrugore dhe çdo strukture tjetër përgjegjëse, të marrin të gjitha masat efektive për të parandaluar të tilla tragjedi, sidomos në këtë periudhë të ngarkuar të sezonit turistik.
Ju bëj thirrje të gjithë qytetarëve të udhëtojnë me shumë kujdes! Shpejtësia vret," ka shkruar Presidenti.
