Tiranë/ Bie suvaja në Pediatri, lëndohen 2 nga fëmijët e shtruar në pavion
Nga Anxhela Celibashi Përditësimi i fundit 1 Qershor 2021, 13:51
Shqetësimeve të prindërve për shëndetin e fëmijëve që kanë të shtruar në pavionin e pneumologjisë në pediatrinë e QSUT u janë shtuar dhe kushtet që ofron spitali. Dy prej tyre rrezikuan të dëmtoheshin nga rënia e suvasë në ambientin ku qëndronin për të marrë ndihmën e mjekut
Këto pamje tregojnë qartë shkëputjen e kësaj pjese që ka rënë pikërisht në krevatin ku qëndronin dy vogëlushët, duke e mbuluar tërësisht atë. Pjesa e suvasë ka prekur anën ku qëndron fëmija por fatmirësisht pa i shkaktuar atij probleme serioze. Inertet kanë rënë edhe në shtratin ngjitur duke lënduar lehtë edhe fëmijën tjetër që ishte i shtruar.
Spitali njofton se menjëherë pas ngjarjes mjekët kanë bërë analizat dhe vizitat e nevojshme për ta dhe fatmirësisht pacientët e vegjël janë në gjendje të mirë shëndetësore.
Mësohet se të lënduarit ishin dy djem të moshave pediatrike dhe pranë tyre ndodheshin dhe prindërit e tyre.
Spitali njofton se janë duke u kryer të gjitha vlerësimet teknike për shkaqet e incidentit dhe marrja e masave të menjëhershme.
Fillimisht ka qenë deputetja e zgjedhur e PD Ina Zhupa e cila ka denoncuar rastin, duke e konsideruar skandal gjendjen spitaleve.
