"Politikanët dhe virologët kanë marrë gjithçka", ish-ushtaraku paralajmëron betejë vdekjeprurëse me policinë
Nga OraNews Përditësimi i fundit 20 Maj 2021, 22:21
Një ish-ushtarak i rrezikshëm belg, ka kërcënuar mjekët dhe qeveritarët pasi nuk është aspak dakord me masat e vendosura nga pandemia.
Njësitë speciale të policisë belge janë në kërkim të tij, pasi besojnë se përbën një kërcënim serioz.
I dyshuari është identifikua si Jurgen Conings, një instruktor ushtarak i qitjes që mori armë nga një kazermë.
Ai thuhet se ka bërë kërcënime në të kaluarën kundër virologut Marc Van Ranst, i cili udhëhoqi përgjigjen e shëndetit publik të Belgjikës ndaj koronavirusit.
Z. Van Ranst dhe familja e tij janë dërguar në një vend të sigurt.
Policia i bëri thirrje publikut që të mos i afrohej të dyshuarit, por të vihej në kontakt nëse ai shihej në zonë.
Autoritetet thonë se ai përfaqëson nivelin më të lartë të kërcënimit dhe mund të ketë plane për të sulmuar individë ose institucione.
Autoritetet kontrolluan për orë të tëra një pyll pranë qytetit Dilsen-Stokkem, jo shumë larg shtëpisë së tij në provincën veriore të Limburg, pasi në një makinë që thuhej se i përkiste ushtarit kishte armë.
Brenda makinës ata gjetën katër raketa antitank dhe municione, por besojnë se i dyshuari është ende i armatosur me armë të tjera, duke përfshirë një automatik, dhe mbante një jelek antiplumb.
Raportet e përshkruanin atë si një "ekstremist potencialisht shumë të dhunshëm".
Ai thuhet se ka lënë një letër që tregon se është i përgatitur për një betejë vdekjeprurëse me policinë dhe "nuk mund të jetojë më në një shoqëri ku politikanët dhe virologët kanë marrë gjithçka".
Të paktën 30 ushtarë me pikëpamje të ekstremit të djathtë po monitorohen nga njësia e Belgjikës për analizën e kërcënimeve dhe i dyshuari thuhet se është njëri prej tyre, raporton BBC.
