"Shqiptarët hodhën hapat e fundit drejt shndërrimit në hetues të Byrosë" Ambasada e SHBA thirrje për aplikime
Nga OraNews Përditësimi i fundit 13 Prill 2021, 18:18
Ambasada Amerikane ka bërë me dije se ditën e djeshme një grup shqiptarësh hodhën hapat e fundit drejt shndërrimit në hetues të Byrosë Kombëtare të Hetimit.
Në një postim që ka bërë në rrjetet sociale, Ambasada thotë se pasi kanë kaluar testimin e arsyetimit logjik u zgjodhën për të marrë pjesë në trajnimin e Ditës së Parë të Klasës së Parë.
"Dje, një grup shqiptarësh nisën të hedhin hapat e tyre të fundit drejt shndërrimit në hetues të Byrosë Kombëtare të Hetimit. Pasi kaluan përmes shqyrtimit të aplikantëve, testimeve të arsyetimit logjik, aftësisë fizike dhe shkrimit të eseve, një paneli intervistash, dhe një kontrolli të imët të karrierës së tyre, ata u përzgjodhën për të marrë pjesë në trajnimin e Ditës së Parë të Klasës së Parë.
Ky grup elitar do të drejtojë luftën kundër korrupsionit dhe krimit të organizuar në Shqipëri."
Ambasada e SHBA në Tiranë bën me dije se Byroja Kombëtare e Hetimeve ka hapur një tjetër thirrje për aplikime, duke kërkuar gra dhe burra të tjerë, nga një gamë e gjerë e prejardhjeve profesionale, të cilët mund të përmbushin standardet për tu bërë anëtarë të BKH.
"Byroja Kombëtare e Hetimeve ka hapur një tjetër thirrje për aplikime, duke kërkuar gra dhe burra të tjerë, nga një gamë e gjerë e prejardhjeve profesionale, të cilët mund të përmbushin standardet e tyre të larta të shkathtësisë mendore dhe aftësisë fizike. Dita e Parë e Klasës së Dytë nuk është larg. Është koha për të bërë përpara!!!"- shkruan Ambasada.
28 kandidatet e BKH të përzgjedhur nga SPAK kanë nisur trajnimet, por për tu plotësuar përfundimisht BKH duhet të ketë 60 anëtarë, ndaj vijon procesi i rekrutimit për 32 pozicionet “hetues”.
