Haradinaj: Kam shumë kohë që nuk kam komunikim me Ramën, qysh prej samitit të Berlinit
Nga OraNews Përditësimi i fundit 8 Shkurt 2021, 22:13
I ftuar në PolitikOn nga Alfred Lela në RTV Ora, ish-kryeministri i Kosovës, Ramush Haradinaj u shpreh se Kosova ka marrëdhënie te respektueshme me Turqinë se e ka njohur Kosovën, por Kosova është vetvetja.
Haradinaj: Ne kemi marrëdhënie te respektueshme me Turqinë se e ka njohur Kosovën, por Kosova është vetvetja. Nuk mund të komentoj pozicionimin e kryeministrit Rama se ka kalkulimet e veta, por unë kam qëndrimet e mia lidhur me atë që ne jemi si shqiptarë dhe të mbesim vetvetja pavarësisht influencave.
Nuk i di mirë kontekstet e Tiranës zyrtare me Athinën Zyrtare dhe Ankaranë Zyrtare. Ne duhet të bëjmë kujdes që të mos dërgojmë mesazhe jo të qarta me aleatët tanë evropianë të sigurisë. Duhet të bëjmë kujdes edhe me Uashingtonin. Ato situata me presidentit Erdogan nuk ishin një qëllim për të pasur konflikt me të, por ishin një detyrim kushtetues që kisha.
Nuk mund të fshihemi sepse orientimi ynë është euroatlantik dhe për këtë nuk duhet të kemi ndonjë farë dileme. Kam shumë kohë që nuk kam komunikim me Ramën, qysh prej samitit të Berlinit.
