"Njerëzve po u bëhet terror për të mos dalë në protesta" denoncimi i avokatit për arrestimet pas protestave
Nga OraNews Përditësimi i fundit 14 Dhjetor 2020, 12:30
Në gjykatën e Tiranës pritet që ditën e sotme të jepen vendimet për masat e sigurisë ndaj të arrestuarve për ditën e dytë dhe të tretë të protestës në Tiranë, nxitur nga vrasja e Klodian Rashës nga një efektiv policie më 8 dhjetor
Avokati i një prej të arrestuarve, me inicialet B.SH, denoncon se në seancë kishte të ndaluar që nuk kishin lidhje me protestën. Edhe klienti I tij thotë se nuk ka pasur fare lidhje me protestën.
Avokati i një prej të arrestuarve denoncon se në seancë kishte të ndaluar që nuk kishin lidhje me protestën. Edhe klienti I tij thotë se nuk ka pasur fare lidhje me protestën por është ndaluar teksa dilte nga një lokal
"Nuk kishte prova të mjaftueshme. E vetmja provë janë raportet e shërbimeve që po bën Drejtoria e Policisë. Nuk ka foto, asnjë element që të hedhin dritë mbi akuzat për kundërshtim të policisë apo pengim të trafikut. Njerëzve po u bëhet terror për të mos u shkuar mendja për protesta” denoncon avokati.
49 të arrestuar në Gjykatë
Gazetarja e Ora News, Keti Banushi, në një lidhje direkte për edicionin e lajmeve nga ambientet e Gjykatës raportoi se janë 49 të arrestuar që iu përkasin moshave 14 deri në 25 vjeç, të cilët presin të dalin para Gjykatës
"Ditën e sotme janë në Gjykatë 42 të arrestuarit e ditës së dytë të protestës, ndërkohë që janë dhe 7 të arrestuarit e ditës së 3 . Pra kemi në total 49 të arrestuar të cilët priten të dalin ditën e sotme para Gjykatës. Theksoj që të gjithë janë mosha të reja që nga 14 deri në 25 vjeç. Seancat kanë nisur në orën 9:30 të paradites së sotme."
Ajo tha se Gjykata ka publikuar listat e emrave të personave që do të dalin sot në Gjykatë për familjarët të cilët presin në ambientet e jashtme.
"Gjithë pjesa e gjykatës është e rrethuar me forca policore dhe familjarë të cilët janë në pritje të të afërmeve të tyre. Në ambientet e jashtme të Gjykatës janë publikuar listat ku janë emrat e të gjithë personave që do të dalin para gjykatës. Për momentin është pezulluar puna për proceset e tjera gjyqësore" raporton gazetarja e Ora News Keti Banushi.
