Atentati ndaj shefit të Policisë Bashkiake, autori 19 vjeçar vetëdorëzohet pas apelit të të atit
Nga OraNews Përditësimi i fundit 15 Tetor 2020, 19:14
Katër ditë pas atentatit të shefit të Policisë Bashkiake të Malësisë së Madhe, ku mbeti i plagosur edhe babai i tij 70 vjeçar, policia ka vënë në pranga Ilirjan Hasanaj.
Burimet për Ora News bëjnë me dije se 19 vjeçari, Ilirjan Hasanaj, është vetëdorëzuar te patrullat e policisë në Velipojë pas disa ditëve arrati.
Mësohet se i riu ka pranuar krimin ndërsa po shoqërohet në drejtorinë vendore të policisë së Shkodrës ku do të merret në pyetje nga grupi hetimor.
Për dorëzimin e tij duket se faktor kyç ka qenë thirrja e të atit, i kthyer nga Anglia, i cili i kërkoi të birit të dorëzohet dhe të marrë përgjegjësi për aktin.
“I bëj thirrje djalit tim, publikisht, që një orë e më parë, një minute e më parë, në komisariatin, në drejtorinë më të afërt të Policisë së Shtetit, te polici i rrugës, të bëjë dorëzimin, të dorëzohet.Unë si prind do ta mbështes, do ta mbaj afër fëmijën tim, pavarësisht fatkeqësisë që më ka ndodh”, apeloi Arben Hasanaj.
Atenati ndaj shefit të Policisë Bashkiake të Malësisë së Madhe, Mentor Hasanaj, ndodhi të dielën, në Shkodër.
Për pasojë mbeti i plagosur rëndë 39 vjeçari dhe babai i tij i moshuar, ndërsa bashkëshortja shpëtoi pa lëndime.
Ilirjan Hasanaj u shpall në kërkim brenda harkut kohor të 24 orëve nga ngjarja dhe policia shkoi drejt emrit të tij nga provat biologjike që gjeti në motorrin dhe skafandën e braktisur pas atentatit ndaj shefit të policisë bashkiake Malësi e Madhe.
LEXO MË SHUMË: Atentat me armë zjarri në Shkodër, plagosen shefi i policisë bashkiake të Malësisë së Madhe dhe i ati
