Ballkani në axhendën e rëndësishme të BE-së dhe në mënyrë specifike të Gjermanisë
Nga OraNewsPërditësimi i fundit 29 Gusht 2014, 15:48
Në një intervistë të dhënë për Radio-Televizionin ORA NEWS, Drejtori i Përgjithshëm i Agjencisë Telegrafike Shqiptare, Gëzim Podgorica u shpreh se samiti i Berlinit shënon një fazë të re, cilësisht mjaft pozitive të marrëdhënieve të Ballkanit Perëndimor me BE dhe specifikisht me Gjermaninë, po edhe Francën dhe Austrinë. Sigurisht që Ballkani asnjëherë nuk ka dalë nga axhenda evropiane, ose të ketë qenë në periferi të saj, por kohët e fundit, e posaçërisht samiti i djeshëm e kanë kthyer në axhendën e sipërme me një vëmendje maksimale. Kjo vëmendje është një shans i ri për këtë rajon, i cili e ka lënë pas historinë e tij të trazuar dhe është i mirëkuptuar për të shikuar drejt së ardhmes me optimizëm dhe me një mbështetje shumë dimensionale që nuk e ka pasur asnjëherë më parë. Duhet theksuar se ajo që krijon siguri në realizimin e gjithçka çfarë u arrit ose u dakordësuan ditën e djeshme, është edhe fakti që gjithë këtë proces e udhëheq Gjermania, fuqia politike dhe ekonomike e së cilës luan një rol mjaft përcaktues jo vetëm në zhvillimet në kontinentin tonë, por shumë më gjerë, në aspektin global. Ky është rasti gjithashtu për t’i dhënë një përgjigje gjithë atyre që kanë shfaqur rezerva se Gjermania është skeptike lidhur me zgjerimin e BE-së . Gjithçka u arrit të afishohej dje, është e kundërta e asaj që mund të jetë parë me rezervë deri tani. Gjermania ka rolin e liderit me një përgjegjësi që vetëm ata dinë ta bëjnë aq mirë. Këmbëngulja dhe rigoroziteti gjerman besoj do ta vënë në pozita më të përgjegjshme gjithë rajonin për të plotësuar objektivat e përcaktuara dhe standardet që kërkohen për integrimin në BE .
Samiti evidentoi edhe faktin se Ballkani perëndimor jo vetëm është pjesë e një axhendë shumë të rëndësishme , por për të pasur një ritëm tjetër të hapave drejt integrimit, mbështetja nuk do të jetë jo vetëm politike, por edhe ekonomike. Në një moment kur bota ka disa vatra krizash mjaft të nxehta dhe me një rezonancë dhe impakt global , pikërisht në këtë moment sytë e Evropës kthehen në mënyrë shumë serioze nga Ballkani, pavarësisht se ai tashmë është një rajon i qetë dhe i është kthyer mirëkuptimit dhe kompromiseve. Normalisht, ka mjaft kompromise të munguara që u nënvizuan edhe në samit, por fakti është se tani kemi nje Ballkan tjetër , mirëkuptues dhe bashkëpunues mes vetes, me një axhendë që ka frymë europianiste dhe me marrëveshje dypalëshe që po prekin të gjitha fushat.
Ajo që kryeministri Rama potencoi në konferencën e shtypit, për një Ballkan që si kurrë më parë është larg tensioneve dhe në mirëkuptim shumë të gjerë, pjesë e së cilës interpretohet edhe ftesa e Kryeministrit të Serbisë dhe përgjigja pozitive e Shqipërisë për të qenë në Beograd me 22 tetor, tregojnë se qasja e re është prezente në Shqipëri, Kosovë, Serbi, Mal të Zi e gjetkë. Si argument shtesë në këtë rast mund të përmendim edhe faktin se Kosova dhe Serbia u dakorduan për t’i dhënë një hop të ri cilësor bisedimeve dhe marrëveshjeve në mes tyre. Ballkani pra është me një pamje tjetër, drejt rrugëtimit europian.
Sigurisht që jo vetëm vendet tona aspirante ose anëtare të BE-së, por edhe ata që na mbështesin e dimë fort mirë se rruga është e gjatë, e vështirë, por më e duhura.
Pritshmëritë pas samitit janë të mëdha. Sot në fakt po flitet shumë për projekte që do të kenë një impakt mjaft zhvillues për rajonin, aq më tepër që nuk kemi të bëjmë me projekte të ndara, por projekte të ndërlidhen me njeri-tjetrin dhe që kërkohet kontribut i përbashkët. Siguria për realizimin e tyre është shumë e lartë, dhe është e kuptueshme një gjë e tillë, kur kemi parasysh faktin se në të gjithë hapat që pasojnë, pas këtyre projekteve qëndron Gjermania.
Kjo është një garanci e shtuar dhe optimiste, por në anën tjetër vendet përfituese janë përballë detyrimesh mjaft të mëdha ndaj shtetit serioz gjerman i cili ka marrë përsipër të jetë në krye të këtij procesi. Projektet e infrasturkturës, sigurimi i energjisë, mbështetja për ndërmarrjet e vogla dhe të mesme, financimi dhe edukimi i kapitalit njerëzor dhe projektet turistike janë pjesë rajonale dhe ku secili shtet do të ketë përfitimin, por edhe përgjegjësinë shumëplanëshe të tij.
Ballkani është futur në shinat e reja të zhvillimit dhe përafrimit me vendet e BE-së. Shpejtësia me të cilën do të ecë varet nga vetë rajoni, nga të kuptuarit ndryshe të proceseve, nga investimi i përbashkët, por edhe nga një qasje tjetër ndaj demokracisë. Vendet në bashkëpunim me njeri-tjetrin, por edhe brenda tyre kanë detyra të tjera mjaft specifike që normalisht do t’i detajojnë në mënyrë të mëvetshme dhe do të investohen për t’i realizuar.
Tani ka filluar një proces i ri pune për katër vitet e ardhshme, proces që kërkon një angazhim tjetër për përmbushjen e projekteve dhe të klimës së re politike, një proces që entuziazmit të këtyre ditëve, duhet t’i zërë vendin domosdoshmërisht puna e detajuar dhe konkrete, bashkëpunuese dhe cilësisht e re në të gjithë dimensionin e saj.
Mendoj se Shqipëria po afishon çdo ditë e më shumë një politikë europianizuese si në menaxhimin e përgjegjësive që ka pas marrjes së vendit kandidat për në BE, ashtu edhe në raportet me vendet që e mbështesin, në mënyrë të posaçme me Gjermaninë, po edhe vende të tjera anëtare të BE-së. Partneriteti strategjik me Gjermaninë nuk mendoj së është retorikë, por pjesë e një platformë nga ku politika shqiptare e ka qartësuar pozicionin nga duhet të ecë në të ardhmen, të paktën për të mos humbur më kohë, pasi jemi ndërgjegjësuar pothuaj të gjithë së çfarë kemi humbur./ATA
