Bozdo: Nga bashkitë po shpërdorohen paratë e qytetarëve me punësime partiake në vend të investimeve

Nga OraNews Përditësimi i fundit 28 Maj 2026, 11:18

Ndarja territoriale dhe mënyra se si menaxhohen bashkitë në Shqipëri mbetet një temë e nxehtë debati, me theks të veçantë në balancën mes centralizimit dhe copëtimit ekstrem.

Deputeti demokrat i Komisionit të Posaçëm për Reformën Territoriale, Eno Bozdo, në dëgjesën e sotme me kryebashkiakët e qarkut të Beratit u shpreh se situata në qarkun e Beratit reflekton një problematikë mbarëkombëtare, duke ngritur alarmin mbi menaxhimin e fondeve publike dhe ofrimin e shërbimeve ndaj qytetarëve.

Nga njëra anë, centralizimi i mëtejshëm i pushtetit vendor rrezikon të sjellë një mungesë të theksuar të investimeve dhe shërbimeve bazë.

Nga ana tjetër, një ndarje tepër e copëtuar territoriale çon pashmangshmërisht në shpenzime të kota dhe mungesë efektiviteti. Kërkimi për një ekuilibër të artë mes këtyre dy ekstremeve duket se është sfida kryesore e pushtetit lokal që pritet të reformohet.

Megjithatë, shqetësimi i vërtetë i Bozdos që rëndon mbi buxhetet lokale është fryrja e administratës. Në të gjithë vendin, tha ai, vihet re një fenomen abuziv ku bashkitë dyfishojnë apo trefishojnë numrin e punonjësve, duke gllabëruar fondet që duhet t'i dedikoheshin komunitetit. Këto para lipset të rialokohen urgjentisht në investime dhe shërbime publike reale.

Qëllimi i një bashkie plotësisht funksionale duhet të jetë ofrimi i drejtësisë në investime, duke trajtuar të barabartë si qendrën ashtu edhe zonat rurale.

Është jetike, vijoi Bozzdo, që edhe qytetari i zonës më të thellë të ketë mundësinë të trokasë në dyert e institucioneve dhe zëri i tij të dëgjohet me peshë të plotë në Këshillin Bashkiak, duke i dhënë fund praktikave ku taksat shpenzohen vetëm për rroga zyrash.

NDIQNI PUNIMET E SOTME TË KOMISIONIT PËR REFORMËN TERRITORIALE