Deputetë gjermanë të AfD pritet të shkojnë në “Davosin e Putinit”, afrim mes Kremlinit dhe së djathtës gjermane
Nga OraNews Përditësimi i fundit 13 Maj 2026, 17:40
Rusia ka ftuar disa politikanë të partisë së ekstremit të djathtë gjerman Alternative für Deutschland (AfD) për të marrë pjesë në Forumin Ekonomik Ndërkombëtar të Shën Petersburgut, i njohur edhe si “Davosi i Putinit”.
Sipas raportimeve të Politico, dy deputetë të Bundestagut nga AfD, Markus Frohnmaier dhe Steffen Kotré, pritet të jenë pjesë e forumit që mbahet në qershor.
Ftesat janë dërguar nga një këshilltar i presidentit rus Vladimir Putin.
Në ftesë thuhet se pjesëmarrja në forum mund të ndihmojë në forcimin e marrëdhënieve ekonomike dhe politike mes palëve, ndërsa përmendet edhe prania e mundshme e vetë Putin.
Kjo lëvizje shihet si shenjë e afrimit mes Kremlinit dhe një pjese të së djathtës radikale në Gjermani, në një kohë kur AfD po rritet në disa rajone të vendit.
Ndërkohë, drejtuesja e AfD-së, Alice Weidel, ka pasur më herët përpjekje për të kufizuar udhëtimet e deputetëve drejt Rusisë, për të shmangur kritikat politike brenda Gjermanisë.
Pavarësisht kësaj, disa përfaqësues të partisë mbështesin rifillimin e kontakteve me Moskën, përfshirë edhe bashkëpunimin ekonomik dhe furnizimet me energji.
Pas nisjes së luftës në Ukrainë, shumica e liderëve europianë e kanë bojkotuar këtë forum, ndërsa më herët ai frekuentohej edhe nga figura të larta si ish-kancelarja gjermane Angela Merkel.
