PAQJA KËRKOHET NËPËR SAMITE/ Presidenti Zelensky në Rumani për samitin strategjik rajonal
Nga Katerina Hysenllari Përditësimi i fundit 13 Maj 2026, 14:34
Samiti Bukuresht 9 mblodhi liderët e Europës Lindore dhe NATO-s mes tensioneve të forta me Rusinë dhe sulmeve të reja ndaj Ukrainës. Presidenti Zelensky kërkoi bashkëpunim më të madh për sigurinë europiane, ndërsa ministri i jashtëm rus Sergei Lavrov deklaroi se procesi i paqes mbetet i bllokuar.
Presidenti ukrainas Volodymyr Zelensky mbërriti në Rumani për të marrë pjesë në samitin e vendeve të njohura si “Bukuresht 9”, një grup shtetesh të Europës Lindore dhe Baltikut që bashkëpunojnë ngushtë me NATO-n për çështjet e sigurisë.
Në një deklaratë në rrjetin X, Zelensky tha se samiti zhvillohet në një moment kritik për sigurinë europiane dhe se nevojiten “vendime dhe punë të përbashkëta” për të garantuar më shumë siguri për të gjithë rajonin.
Në hapjen e samitit në Bukuresht, presidenti rumun Nicușor Dan deklaroi se siguria e Moldavisë dhe Ukrainës lidhet drejtpërdrejt me sigurinë e vendeve të NATO-s. Ai bëri thirrje për rritje të shpenzimeve ushtarake dhe forcim të kapaciteteve mbrojtëse të aleancës.
Edhe presidenti polak Karol Nawrocki mbajti një ton të ashpër ndaj Moskës, duke thënë se agresioni rus nuk është thjesht një konflikt lokal, por një sfidë direkte ndaj gjithë rendit të sigurisë euro-atlantike. Sipas tij, Europa Lindore nuk është më periferia e NATO-s, por qendra strategjike e saj.
Në të njëjtën kohë, ministri i jashtëm rus Sergei Lavrov deklaroi se, megjithëse ka pasur disa sinjale pozitive në marrëdhëniet me SHBA-të nën administratën Trump, procesi i paqes për Ukrainën mbetet i bllokuar dhe “asgjë konkrete nuk po ndodh”.
Vendet e NATO-s në Europën Lindore janë skeptike ndaj deklaratave ruse. Ata besojnë se Rusia po përdor diplomacinë për të fituar kohë, ndërsa vazhdon ofensivën ushtarake.
