Rama me drejtuesit e qarqeve/ PS drejt 35-vjetorit, diskutime për anëtarësimet e reja dhe hapjen e sezonit turistik
Nga OraNews Përditësimi i fundit 7 Maj 2026, 16:35
Për rreth 40 minuta, kryesocialisti Edi Rama mblodhi në selinë rozë drejtuesit politik të qarqeve të Partisë Socialiste.
Në qendër të diskutimeve ishin rifomatimi, rienergjizimi dhe përgatitjet për 35-vjetorin e themelimit të Partisë Socialiste.
Më 12 qershor, PS do të kremtojë 35-vjetorin e saj, një përvjetor që pritet të shoqërohet me shtim të anëtarësimeve dhe disa ndryshime në strukturat drejtuese, me qëllim dhënien e më shumë freskie dhe energjie të reja partisë në qeveri prej katër mandatesh.
Gjatë takimit u diskutua edhe për hapjen e sezonit turistik veror dhe masat që duhen marrë për mbarëvajtjen e tij.
Socialistët e konsiderojnë turizmin një nga sektorët kryesorë të ekonomisë shqiptare, ndërsa investimet në këtë fushë janë në rritje.
U theksua gjithashtu nevoja që problematikat e konstatuara vitin e kaluar të mos përsëriten.
Në takim u trajtua edhe ecuria e punëve në vend, një temë që sipas burimeve mbetet pjesë e rregullt e diskutimeve në mbledhjet e kryesocialistit me drejtuesit politik të qarqeve.
