“Jet Bank” dhe Oliver Hemer - Banka digjitale në Shqipëri, Këlliçi akuza për lidhje me rrjete mashtrimi dhe pastrim parash
Nga OraNews Përditësimi i fundit 7 Maj 2026, 12:08
Në seancën parlamentare deputeti demokrat Belind Këlliçi ngriti akuza të rënda dhe pyetje direkte për kryeministrin Edi Rama në lidhje me licencimin e bankës më të re tregtare në vend, “Jet Bank”.
Këlliçi shprehu shqetësime serioze për lidhjet e dyshimta të aksionerëve kryesorë të bankës me skema mashtrimi ndërkombëtare dhe rrjete të pastrimit të parave, duke vënë në pikëpyetje sigurinë e sistemit financiar dhe depozitave të qytetarëve shqiptarë.
Në qendër të akuzave të ligjvënësit demokrat është aksioneri mаzhoritar i “Jet Bank” me 71.52% të aksioneve, shtetasi Oliver Hemer. Gjatë interpelancës u theksua se autoritetet rregullatore në Gjermani, Britani, Spanjë dhe Estoni kanë dokumentuar lidhjet e Hemer me skemën mashtruese “4XFX” dhe me rrjetin e Gal Barak, i cili është dënuar në Austri për mashtrim me një dëm financiar që i kalon 200 milionë eurot.
Përveç kësaj, u vu në dukje mungesa totale e eksperiencës në fushën bankare për të gjithë aksionerët dhe anëtarët e bordit drejtues të bankës së re. Kjo, sipas Këlliçit, përbën një rrezik të shtuar për stabilitetin financiar, pasi një dështim i mundshëm i kësaj banke do të mbulonte vetëm një pjesë të kufizuar të depozitave nga Agjencia e Sigurimit të Depozitave, ndërsa pjesa tjetër e barrës do të binte mbi bankat e tjera të sistemit, duke tronditur besimin e publikut.
PJESË NGA FJALA E BELIND KËLLIÇIT
Për këtë interpelancë duke i drejtuar pyetjet e mëposhtme kryeministrit. Një, a ka dijeni kryeministri Edi Rama për lidhjet e dokumentuara nga autoritetet rregullatore gjermane, britanike, spanjolle dhe estoneze të shtetasit Oliver Hemer, drejtor i shoqërisë Konsador LTD, aksioner me 71.52% i Jet Bank, me skemën mashtruese 4XFX dhe rrjetin e Gal Barakut, të dënuar në Austri për mashtrim me dëm financiar në vlerën mbi 200 milionë euro?
Dy, a mundet të garantojë kryeministri Edi Rama për qytetarët shqiptarë se depozitat e tyre në Jet Bank do të jenë të sigurta duke patur parasysh se, Agjencia e sigurimit të depozitave mbulon vetëm shumat të kufizuara për depozituesit.
Fondi i ASD-së financohet nga kontributet e të gjitha bankave të tjera në treg, duke e kthyer riskun e një banke të re në një risk që në rast dështimi do të përballohej nga fondi i krijuar prej kontributeve të sistemit bankar e do të kishte pasoja mbi besimin e qytetarëve në të gjithë sistemin financiar.
Dhe asnjë prej aksionarëve dhe anëtarëve të bordit të Jet Bank nuk ka eksperiencën e mëparshme në drejtim bankar, as nuk ka operuar kurrë në një bankë tregtare në ndonjë vend tjetër të botës apo dhe në Shqipëri.
Tre, a ka kërkuar kryeministri, pa cenuar pavarësinë ligjore të Bankës së Shqipërisë, që Ministria e Financave, Drejtoria e Përgjithshme e Parandalimit të Pastrimit të Parave, shërbimet përgjegjëse të sigurisë kombëtare dhe institucionet ligjzbatuese të verifikojnë burimin e kapitalit, pronësinë përfituese, lidhjet e raportuara me platforma të palicencuara financiare dhe çdo risk të mundshëm për pastrim parash që lidhet drejtpërdrejtë me licencimin dhe nisjen e aktivitetit të Jet Bank.
Katër, a ka kërkuar kryeministri Edi Rama verifikime të hollësishme nga Shërbimi Informativ Shtetëror dhe Agjencia e Inteligjencës Financiare mbi aksionarët, pronarët përfitues dhe anëtarët e organeve drejtuese të Jet Bank, veçanërisht mbi shtetasit Oliver Hemer, Idan Avishai, Rami Solomon dhe Saniel Sanileviç, duke patur parasysh se lidhjet e disa prej tyre sipas burimeve të hapura, i lidhin me struktura të dokumentuara nga autoritetet policore europiane si rrjete pastrimi parash. Përbëjnë çështje me implikime të drejtpërdrejta këto në sigurinë kombëtare dhe stabilitetin financiar të vendit.
Pesë, a mundet të konfirmojë apo mohojë kryeministri Edi Rama pretendimet publike se licencimi i Jet Bank është mbështetur nga persona me ndikim pranë qeverisë, sipas informacioneve të raportuara në media serioze në vend, dhe a është hetuar kjo çështje nga organet përkatëse të qeverisë?
Gjashtë, a është kërkuar informacion nga autoritetet homologe britanike, gjermane, estoneze, qipriote, holandeze, izraelite dhe kroate për aksionarët, administratorët, (bell rings) sa ta përfundoj, të lutem. Përfundoni. Administratorët, pronarët përfitues dhe shoqëritë e përfshira në strukturën e Jet Bank, përpara dhe pas dhënies së licencës përfundimtare. Nëse po, cilat institucione janë pyetur dhe cilat janë përgjigjet që janë marrë?
Edhe dy pyetje të lutem kam. Shtatë, a janë vënë në dijeni partnerët tanë ndërkombëtarë, veçanërisht Komisioni Europian, Banka Qendrore Europiane, autoriteti i Bashkimit Europian kundër pastrimit të parave, si dhe delegacioni i Bashkimit Europian në Tiranë për licencimin e kësaj banke dhe strukturën e saj të pronësisë?
