Teherani merr përgjigje për paqen, Trump sinjalizon refuzim dhe tensionet rriten
Nga OraNews Përditësimi i fundit 3 Maj 2026, 22:11
Irani ka bërë të ditur se ka marrë përgjigjen e Shteteve të Bashkuara për propozimin e tij të fundit për bisedime paqeje. Sipas mediave shtetërore iraniane, dokumenti është dërguar përmes Pakistanit dhe aktualisht po shqyrtohet nga autoritetet në Teheran.
Nga pala amerikane dhe ajo pakistaneze nuk ka ende konfirmim zyrtar për këtë komunikim.
Në Iran është bërë e ditur se nuk ka negociata aktive për programin bërthamor në këtë moment dhe se çdo bisedim i mundshëm duhet të vijë pas uljes së tensioneve në rajon, përfshirë situatën në Gjirin Persik.
Nga ana tjetër, presidenti amerikan Donald Trump ka thënë se nuk e ka parë ende në detaje propozimin iranian, por ka lënë të kuptohet se është i vështirë për t’u pranuar.
Ai ka shtuar gjithashtu se SHBA nuk përjashton hapa të tjerë nëse situata përkeqësohet.
Propozimi i Iranit përfshin disa pika, mes tyre kërkesën për heqjen e sanksioneve, lirimin e aseteve të ngrira dhe ndryshime në praninë ushtarake amerikane në rajon, si dhe zgjidhje për situatën në Ngushticën e Hormuzit, e cila ka ndikuar në transportin global të energjisë.
SHBA nga ana e saj kërkon kufizime të forta në programin bërthamor të Iranit, përfshirë kontroll më të rreptë mbi rezervat e uraniumit të pasuruar, përpara çdo marrëveshjeje.
