Dhjetë viktima nga sulmet ruse në Ukrainë, ndërsa Volodymyr Zelensky godet flotën “në hije”
Nga OraNews Përditësimi i fundit 3 Maj 2026, 15:19
Sulmet ajrore ruse me dronë dhe raketa në Ukrainë kanë shkaktuar të paktën 10 viktima dhe 76 të plagosur gjatë 24 orëve të fundit, sipas raportimeve të BBC.
Goditje janë regjistruar në disa rajone të vendit, ndërsa sulmet ndaj qyteteve ukrainase vijojnë pothuajse çdo ditë.
Sipas autoriteteve lokale, tre persona humbën jetën në rajonin e Khersonit, nga dy në Odesë, Donetsk dhe Zaporizhzhia, si dhe një në rajonin e Sumit.
Nga ana tjetër, presidenti ukrainas Volodymyr Zelensky bëri me dije se një terminal nafte në veriperëndim të Rusisë ka pësuar dëme të mëdha.
Gjithashtu, dy anije cisternë ruse janë goditur pranë portit të Novorossiysk. Sipas tij, këto mjete ishin pjesë e flotës që përdoret për të shmangur sanksionet perëndimore.
Ushtria ukrainase njofton se Rusia ka lëshuar një raketë balistike dhe rreth 270 dronë, por pjesa më e madhe e tyre është neutralizuar në ajër.
Ndërkohë, Rusia pretendon se Ukraina ka përdorur të paktën 334 dronë në sulme kundër territorit të saj, me rajonin e Leningradit ndër zonat më të goditura.
Në javët e fundit, Ukraina ka shtuar sulmet ndaj infrastrukturës ruse të naftës, duke synuar depot dhe terminalet e eksportit. Këto goditje, sipas Kievit, kanë ndikuar ndjeshëm në të ardhurat nga eksportet e energjisë. Nga ana tjetër, autoritetet ruse përpiqen të ulin rëndësinë e dëmeve, megjithatë shqetësimi për depërtimin e dronëve në thellësi të territorit rus mbetet i dukshëm.
