Rama inspekton “Parkun Retro” në Bulqizë, projekti i ri urban synon zhvillimin e turizmit në Dibër
Nga OraNews Përditësimi i fundit 24 Prill 2026, 19:09
Në Bulqizë, kryeministri Edi Rama ka inspektuar nga afër ecurinë e punimeve në kantierin e “Parkut Retro”, një projekt i ri urban që synon të kthehet në një pikë referimi për zonën dhe më gjerë.
Projekti, i shtrirë në një sipërfaqe prej rreth 11 hektarësh, është konceptuar si një hapësirë multifunksionale në shërbim të komunitetit dhe vizitorëve. “Parku Retro” parashikon ambiente çlodhjeje, kënde rekreative, si dhe elementë që ndërthurin natyrën me identitetin lokal.
Gjatë inspektimit, Rama theksoi rëndësinë e investimeve të tilla për zhvillimin e turizmit në Dibër, veçanërisht në kushtet kur fluksi i vizitorëve është rritur ndjeshëm falë Rruga e Arbrit. Kjo arterie rrugore ka lehtësuar aksesin dhe ka sjellë më shumë turistë drejt zonave verilindore të vendit.
Sipas tij, projekte si “Parku Retro” jo vetëm përmirësojnë cilësinë e jetës për banorët, por gjithashtu krijojnë mundësi të reja për zhvillim ekonomik dhe nxitje të turizmit lokal.
Punimet në kantier vijojnë me ritme të shpejta, ndërsa pritet që hapësira e re të shndërrohet në një destinacion tërheqës për familjarë, të rinj dhe vizitorë nga e gjithë Shqipëria dhe më gjerë.
