Ndahet nga jeta Qemal Disha! Ish-Ministër i Financave dhe themeluesi i kompanisë së sigurimeve “SIGMA”
Nga Ora News Përditësimi i fundit 8 Janar 2026, 15:35
Siç bën të ditur kompania e sigurimeve “Sigma Vienna Insurance Group” është ndarë nga jeta Qemal Disha, themeluesi i kësaj kompanie, si e para kompani private në tregun e sigurimeve në Shqipëri.
Qemal Disha nuk ishte thjesht një drejtues. Ai ishte një arkitekt vizioni, një mendje strategjike dhe një njeri që e pa sigurimin jo si produkt, por si kontratë besimi me shoqërinë. Në një kohë tranzicioni të thellë ekonomik dhe institucional, ai pati guximin të ndërtojë një model biznesi të bazuar mbi profesionalizëm, korrektësi dhe përgjegjësi afatgjatë.
I lindur në vitin 1951 në fshatin Sopot të komunës së Zerqanit në Dibër, Qemal Disha ndërtoi një profil të rrallë profesional, duke ndërthurur formimin akademik në ekonomi me një eksperiencë të gjerë në administratën publike dhe sektorin financiar.
Kontributi i tij drejtues i sektorëve të financës në indtitucione të ndryshme, si pedagog në fakultetin e ekonomisë në Universitetin e Tiranës, si ministër i Financave, në themelimin dhe drejtimin e INSIG-ut dhe më pas në krijimin dhe konsolidimin e SIGMA-s, shënon etapa kyçe në historinë moderne të sigurimeve në vend.
Në vitet kur tregu i sigurimeve ishte ende në formësim, Qemal Disha zgjodhi rrugën më të vështirë: të ndërtojë standarde aty ku mungonin, të krijojë besim aty ku kishte pasiguri dhe të udhëheqë me shembull, jo me retorikë. Nën drejtimin e tij, SIGMA u pozicionua si një kompani që respekton klientin, paguan detyrimet dhe ndërton marrëdhënie afatgjata – vlera që mbeten themel i identitetit tonë edhe sot.
Megjithatë, trashëgimia e Qemal Dishës shkon përtej institucioneve që drejtoi. Ai do të mbahet mend si mentori që investoi tek njerëzit, që krijoi hapësirë për breza të rinj profesionistësh dhe që ndërtoi një kulturë pune të bazuar në etikë, respekt dhe meritokraci. Për konkurrentët e tij, ai ishte një aktor stabilizues në një treg në zhvillim.
Për bashkëpunëtorët, një udhëheqës që udhëhiqte me shembull. Për familjen, një njeri i përkushtuar dhe mbështetës.
Ngushëllimet më të sinqerta familjes Disha, miqve dhe të gjithë bashkëpunëtorëve që patën privilegjin ta njohin dhe të punojnë me të.
