Peizazhe 360 gradë nga maja e Bukanikut në Elbasan
Nga OraNews Përditësimi i fundit 14 Shtator 2025, 14:31
Elbasani ofron një potencial të jashtëzakonshëm për turizmin malor, për shkak të larmisë së relievit dhe resurseve natyrore.
Një ndër to është edhe Maja e Bukanikut, pika më e lartë e Malit të Shpatit, i cili ndodhet 30 km nga qendra e Elbasanit dhe vetëm 9 km nga fshati i Gjinarit.
Kryeministri Edi Rama ndau sot në rrjetet sociale pamje nga peizazhet 360 gradë që mund të shihen nga Maja e Bukanikut, si një ftesë për t’u vizituar nga të pasionuarit pas ngjitjeve në mal.
“Peizazh magjepsës nga maja e Bukanikut”, shkruan Rama.
Në një lartësi prej 1,821 m mbi nivelin e detit, kjo pikë mjaft tërheqëse është kthyer vitet e fundit në një vend të preferuar nga vizitorët që parapëlqejnë ecjet e gjata në natyrë dhe ngjitjet në mal.
E njohur si një zonë perfekte për piknik dhe ecje, për ata që janë të pasionuar pas ngjitjeve në mal, kanë stërvitjen e duhur dhe kërkojnë diçka më shumë gjatë vizitës së tyre në Elbasan, nga maja e Bukanikut ata mund të shohin edhe Detin Adriatik.
Ngjitja mund të zgjasë rreth 3 orë, duke u nisur nga fshati i Gjinarit dhe grupe të ndryshme udhërrëfyese ofrojnë guida me pikënisje nga Elbasani ose edhe nga Tirana, për të gjithë ata që duan të bëhen pjesë e kësaj eksperience dhe të njihen nga afër me një nga pikat më të kërkuara në rrethinat e Elbasanit.
