Barazoi rekordin e Maradonës në kombëtare, Lautaro: Vit spektakolar
Nga OraNews Përditësimi i fundit 20 Nëntor 2024, 11:05
Lautaro Martinez shënoi golin që i dha fitoren Argjentinës ndaj Perusë dhe arrin në kuotën e 32 finalizimeve për kombëtaren e tij.
Sulmuesi i Interit ka barazuar rekordin e Diego Armando Maradonës në moshën 27-vjeçare dhe është entuziast për këtë arritje, teksa për TyC Sports shprehet:
"Jam i lumtur, sepse e gjithë familja ime erdhi dhe unë gjithmonë dua të bëj më të mirën time. Ky vit ka qenë shumë pozitiv dhe për fat e kemi mbyllur me fitore. Ishte një vit spektakolar për sa u përket paraqitjeve, golave, ndeshjeve të luajtura”.
Më pas ai shtoi në kanalet zyrtare të përfaqësueses bardhekaltër:
“Gjithmonë dua të jap maksimumin, duan të na mundin të gjithë, por Argjentina është gjithmonë protagoniste. Ka gjëra për të përmirësuar, por ne duhet të vazhdojmë në këtë rrugë".
