Mblidhet sot Komisioni i Reformës Zgjedhore, a do të shkojnë anëtarët e grupimit të Berishës?
Nga OraNews Përditësimi i fundit 19 Janar 2024, 08:33
Komisioni i Posaçëm i Reformës Zgjedhore do të mblidhet sot në orën 11:00. Ashtu siç edhe dihet, Komision do të drejtohet nga dy bashkëkryetarët, Damian Gjiknuri dhe Enkelejd Alibeaj.
Mbledhja e këtij Komisioni vjen pas takimeve që u zhvilluan me përfaqësuesit e OSBE ne vendin tone, ndërkaq mbetet e paqartë nëse anëtarët e komisionit që janë pjesë e PD-së së grupimit të drejtuar nga ish-kryeministri Sali Berisha do të vendosin të jenë pjesë e kësaj mbledhjeje, duke protestuar apo nuk do t'i bashkohen komisionit.
Kujtojmë se dje OSBE iu bëri thirrje të gjithë deputetëve në Kuvendin e Shqipërisë që të normalizohet procesi parlamentar.
“Çmojmë partneritetin tonë me Kuvendin e Shqipërisë. U bëjmë thirrje të gjithë deputetëve të kontribuojnë për një proces parlamentar të qetë e funksional. Punimet e papenguara dhe dialogu konstruktiv në komisione janë thelbësore. Përkushtimi ynë për një reformë zgjedhore gjithëpërfshirëse dhe në kohë mbetet i fortë. Angazhimi pozitiv i të gjithëve është vendimtar për të pasur sukses!”, -thuhet në deklaratën e OSBE.
