Durrësi ende problem me plehrat, kazanëve të tejmbushur u vihet flaka
Nga Mark Brunga Përditësimi i fundit 9 Mars 2023, 14:56
Megjithëse ka kohë që në Durrës është deklaruar se problemi i mbetjeve urbane është zgjidhur, ende qytetarë të ndryshëm vazhdojnë të sjellin në redaksi pamje me mbetje në kazanët e tejmbushur.
Kjo situatë deri tani është më kritike në lagjen nr 17 në rajonin e ish-kënetës, por konstatohet me raste edhe në lagjen nr 15. Ditën e martë një rast i tillë u vu re në këtë lagje, ku një grup koshash ishin të mbushur dhe në njërin prej tyre mbetjet ishin përfshirë nga flakët.
Djegia e tyre në qiell të hapur në mes të lagjes së banuar afër banesave sjell pasoja të rënda shëndetësore.
Dihet kosto e rëndë e transportit që ka një ton mbetje deri në Inceneratorin e Tiranës. Dhe shpesh djegia në kazanë ose vendgrumbullime është një rrugë e shpejtë për të kursyer.
Po kjo praktikë e djegies në hapësirat publike është shkelje ligjore që duhet luftuar.
