Dhuna eksportohet edhe në Gramshin e qetë. Grushte arbitrit të ndeshjes nga presidenti, arrestohet

Nga OraNews Përditësimi i fundit 25 Shkurt 2023, 22:26

Gramshi merr stafetën e Shkumbinit dhe Gjirokastrës që pak ditë më parë u bënë kryeqëndra të dhunës në futbollin e Kategorisë së Dytë. Sot, në ndeshjen mes vendasve dhe miqve nga Tropoja, skuadrës së Valbonës, presidenti i skuadrës vendase nuk u kursye ndaj arbitrit kryesor duke e dhunuar pas vendimeve që sipas dhunuesit ishin tendencioze.

Bëhet fjalë për gjyqtarin Anxhi Lushi, i cili akordoi një penallti në favor të miqve dhe ky ishte momenti kulminant. Situata është rënduar aq shumë sa tashmë presidenti i Gramshit duhet të bëjë llogaritë me hetimin penal të hapur në adresë të tij.

Deklarata e plotë e Policisë së Gramshit;

“Komisariati i Policisë Gramsh, në bashkëpunim me Policinë Bashkiake, kishin marrë të gjitha masat për të garantuar rendin dhe sigurinë, para, gjatë dhe pas përfundimit të ndeshjes së futbollit ndërmjet ekipeve sportive Gramshi dhe Valbona, në stadiumin e qytetit të Gramshit.

Masat për sigurinë brenda stadiumit i kishte marrë Policia Bashkiake, ndërsa shërbimet e Komisariatit të Policisë Gramsh, sipas regullores, kishin marrë masat për sigurinë në perimetrin e jashtëm të stadiumit.

Në minutat e fundit të zhvillimit të lojës së futbollit, shtetasi A. B., 24 vjeç, president i klubit të futbollit të Gramshit, ka goditur me grusht shtetasin A. L., 25 vjeç, banues në Tiranë, arbitër i ndeshjes, dhe për këtë arsye është ndërprerë ndeshja.

Menjëherë, shërbimet e Komisariatit të Policisë Gramsh dhe shërbimet e Forcës së Posaçme "Shqiponja" të DVP Elbasan, kanë ndërhyrë në stadium duke parandaluar përshkallëzimin e konfliktit dhe duke shoqëruar shtetasin A. B., në ambientet e Komisariatit të Policisë Gramsh.

Në vijim të veprimeve, Oficerët e Policisë Gjyqësore të Prokurorisë pranë Gjykatës së Rrethit Gjyqësor Elbasan referuan materialet në Prokurori dhe nisi procedimi penal për shtetasit A. B., 24 vjeç dhe D. B., 58 vjeç, banues në Gramsh (babë e bir);

A. B., me detyrë president i klubit të futbollit të Gramshit, për veprat penale "Goditja e sportistit, trajnerit, arbitrit" dhe "Mosbindja ndaj urdhrit të punonjësit të Policisë", pasi, në përfundim të ndeshjes së futbollit të zhvilluar në Gramsh, ndërmjet ekipeve Gramshi dhe Valbona, ka goditur me grusht shtetasin A. L., 25 vjeç, banues në Tiranë, me detyrë arbitër i ndeshjes;

D. B., për veprën penale "Kundërshtimi i punonjësve të Policisë", pasi ka kundërshtuar punonjësit e Policisë, gjatë  shoqërimit të djalit të tij, shtetasit A. B.

Materialet i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme”.