"Profesionisti" ngjitet në skenë, shfaqja me regji të Leka Bungos merr vlerësime të mëdha në Vlorë
Nga Edi Ruçi Përditësimi i fundit 21 Janar 2023, 17:54
Regjisori i mirënjohur Leka Bungo është rikthyer në teatrin "Petro Marko" në Vlorë. Ai ka vënë në skenë mbrëmjen e së premtes premierën e dramës “Profesionisti”. Shfaqja tërhoqi qindra spektatorë, të cilët vlerësuan shfaqjen dhe performancën e aktorëve.
Në mbrëmjen e së premtes teatri "Petro Marko" në Vlorë hapi dyert për të shfaqur për herë të parë premierën e dramës “Profesionisti”.
Pas një periudhe të gjatë provash aktorët u ngjitën në skenë mes emocionesh të mëdha për të performuar rolet e tyre për publikun vlonjat.
Nën regjinë e Leka Bungos dhe interpretimin e aktorëve Viktor Zhusti, Astrit Hasani, Matilda Avduli dhe Artan Islami, drama përcolli mjaft emocione, ndjesi dhe mesazhe tek i gjithë publiku.
Veç emrave të rëndësishëm të artit kombëtar kjo premierë solli në qytetin e Vlorës presidentin e Republikës Bajram Begaj, i cili zgjodhi të promovojë personalisht rëndësinë e kësaj ngjarje kulturore të qytetit.
"Liria është pa çmim, ky është mesazhi i shfaqjes."
Në fund të shfaqes përcolli emocionet e tij dhe regjisori Leka Bungo si dhe aktorët e tjerë.
Shfaqja u mbyll me duartrokitje të mëdha dhe jashtë dyerve të teatrit "Petro Marko" nuk munguan as emocionet e qytetarëve vlonjat.
Premiera "Profesionisti" do të shfaqet sërish në teatrin "Petro Marko" përgjatë fundjavës të shtunën dhe të dielën.
