Shkurret e veshura me qese në Drino, ndotja "mirëpret" turistët në Gjirokastër
Nga Ora News Përditësimi i fundit 29 Dhjetor 2022, 14:26
Rrjedha e lumit Drino në Gjirokastër është tejmbushur me qese e mbeturina të cilat janë varur në shkurret buzë lumit. Kjo panoramë është e patolerueshme në një qytet si Gjirokastra që vizitohet nga mijëra turistë.
"Lumi është transportier që i merr nga një vend origjine në një vend tjetër. Këto mbetje nuk janë autoktone, janë të ardhura.
Problemi ëshët se kush i heq këto, kush i pastron. Po e mirë nuk është që mbeturinat të gjenden poshtë e lart se do shkojnë në det, do lahemi në plazh.
Si mos më keq është. Vetë qeveritarët, deputetët nuk e ngrenë zërin që të thonë shiko si bëhet këtu, si bëhet atje," thonë banorët.
Bashkia e Gjirkastrës ka lënë në harresë dhe përrenjtë që gjatë verës shkaktojnë burim infeksioni ndërsa gjatë dimrit shkaktojnë përmbytje.
Gati 3 ton mbetje përfundojnë çdo ditë në përrejtë malorë që përshkojnë qytetin.
Gjirokastra njihet për terrenin e thyer dhe gati 1/10 e mbetjeve ditore këtu përfundon nëpër përrenj.
Bashkia miratoi dhe gjoba për ndotësit por kjo nismë nuk u vu kurrë në zbatim.
Edhe pse një qytet muze në UNESCO që vizitohet nga mijëra turistë vendas e të huaj, Gjirokastra renditet si një nga vendet më të ndotura në jug të vendit.
