Iran: Të paktën 100 protestues të burgosur përballen me dënimin me vdekje
Nga OraNews Përditësimi i fundit 28 Dhjetor 2022, 17:48
Një numër në rritje i protestuesve në Iran janë dënuar me vdekje ose ka të ngjarë të dënohen për pjesëmarrjen e tyre në protestat pas vdekjes së Mahsha Amini, thonë grupet e të drejtave të njeriut.
Në të gjithë vendin, vlerësohet se të paktën 100 njerëz po përballen me dënimin me vdekje, duke përfshirë pesë gra, sipas OJQ-së me bazë në Norvegji, Iran Human Rights.
Shifra vjen nga njoftimet zyrtare apo raportimet e familjeve në rrjetet sociale. Në realitet ky numër mund të jetë edhe më i madh sepse familjeve u bëhet presion për të heshtur dhe ka shumë raportime për tortura fizike dhe psikologjike të të paraburgosurve.
Dy burra janë ekzekutuar tashmë në dhjetor për “armiqësi kundër Zotit”, pas gjyqeve të njëanshme. Të dy ishin 23 vjeç.
Protestat u shkaktuan nga vdekja e 22-vjeçares Mahsha Amini në shtator, pasi ajo u arrestua për mungesë të hixhabit.
Deri më sot, 476 njerëz janë vrarë gjatë protestave, duke përfshirë 64 fëmijë dhe 34 gra, sipas llogaritjeve të IHR.
