Mbreti Zulu kurorëzohet në një ceremoni të veçantë

Nga OraNews Përditësimi i fundit 29 Tetor 2022, 21:23

Një mbret i ri Zulu është kurorëzuar në një ngjarje historike të ndjekur nga mijëra persona në qytetin bregdetar të Afrikës së Jugut, Durban.

Mbreti Misuzulu u njoh zyrtarisht si monark nga Presidenti Cyril Ramaphosa, i cili i dha atij një certifikatë njohjeje.

Ceremonia ishte kurorëzimi i parë zulu që kur Afrika e Jugut u bë demokraci në 1994.

Përfundon një grindje e gjatë dhe e hidhur për të gjetur një pasardhës për Mbretin Goodwill Zwelithini, i cili vdiq vitin e kaluar.

Ai ishte monarku zulu me mbretërimin më të gjatë, pasi kishte shërbyer në fron për gati 50 vjet.

Ai kishte gjashtë gra dhe të paktën 26 fëmijë.

Vdekja e papritur e nënës së mbretit Misuzulu - një muaj pasi u emërua mbretëreshë regjente, pas vdekjes së burrit të saj - thelloi më tej një luftë për pushtet në oborrin mbretëror.

Princi Bambindlovu Zulu tha për BBC se ai besonte se vëllai i tij do të bashkonte monarkinë dhe popullin e tij.

Në fjalimin e tij të parë pas kurorëzimit të tij, Mbreti Misuzulu tha se ai kishte nisur një udhëtim me komunitetin dhe shpresonte të ishte një "katalizator" për të sjellë ndryshime pozitive.

Kurorëzimi u bë disa ditë pasi SHBA paralajmëroi për rrezikun e një sulmi terrorist në vend.

Disa personalitete vendase dhe të huaja ishin midis dhjetëra mijëra njerëzve që morën pjesë në ceremoninë në stadiumin Moses Mabhida.

Shumë afrikano-jugorë shpresojnë se monarku i ri - siç bëri muajin e kaluar - do të vazhdojë të mbështesë publikisht kauza si adresimi i luftës kundër dhunës gjinore në një vend që ka një nga normat më të larta në botë të përdhunimeve dhe sulmeve seksuale.